DUO ta bishita area Caribense
ORANJESTAD (AAN): Di 11 te cu 29 di november Dienst Uitvoering Onderwijs (DUO) lo bishita Aruba, Corsou, Boneiru y Sint Maarten. DUO lo inicia un campaña pa informa ex-studiantenan cu kisas ta posibel pa reduci e suma cu nan ta paga bek mensualmente na nan debe di estudio. Riba tur e islanan tin oficinanan di servicio temporal habri durante e bishita. Tambe DUO ta organisa sesionnan di informacion tocante financiamento di estudio.
Un parti di e ex-studiantenan cu ta pagando un debe di estudio bek na DUO, ta pagando un suma mensual mas halto cu ta necesario. Esaki ta debi cu ora cu a calcula e suma mensual, no a tene cuenta ainda cu nan entrada. Hopi ex-studiante no sa cu nan mes mester pidi reduccion di e suma mensual y mester entrega nan dato di entrada.
Pa e motibo ey DUO a start un campaña aña pasa. E campaña aki ya tabata hopi exitoso caba, pero pa percura pa mas hende ainda ta na altura, DUO ta bolbe pidi atencion pa esaki. Coördinador pa e area Caribense Monique Hoogerwerf ta splica: ‘Nos ta conseha tur hende pa entrega dato di nan entrada. T’asina cu e montante mensual nobo por baha so y nunca no por bira mas halto.”
Oficinanan di servicio temporal
Personanan cu tin pregunta tocante pago di nan debe di estudio of tocante financiamento di estudio, por acudi sin cita na e oficinanan di servicio temporal. Tin colaboradornan cla pa yuda cu yenamento di formulario of si un persona no tin acceso mas na ‘Mijn Duo’. Ta posibel tambe pa mesora pidi reduccion di e suma mensual. Pa haci esaki tin mester di un declaracion di servicio di impuesto di 2022 y 2023. Bishitantenan mester bin cu un identificacion valido.
Webinar pa personanan cu ta pagando bek
Pa ex-studiantenan DUO ta ofrece un webinar. Banda di informacion tocante pidimento di reduccion di e suma mensual y dunamento di informacion tocante entrada, lo elabora tambe riba e bentahanan di paga bek localmente.
Sesionnan di informacion pa futuro studiantenan
DUO ta organisa sesionnan di informacion pa studiantenan cu kier bay studia na Hulanda. Durante e sesionnan aki, studiantenan ta siña tur cos tocante financiamento di estudio y kico nan mester regla pa cuminsa exitosamente cu nan estudio. E aña aki pa prome biaha DUO ta duna informacion hunto cu e Colaboracion di Academianan na Aruba y Corsou riba mercado di estudio y profesion. Asina por alcansa mas studiante y mayor.
