Universidad di Aruba tambe cu celebracion riba 18 di Maart
ORANJESTAD (AAN): E aña aki pa prome biaha, Universidad di Aruba a tuma decision pa tene un Celebracion di Dia di Himno y Bandera.
Na honor di e di 35 aniversario di existencia di Universidad, y den cuadrl pa celebracion Dia di Himno y Bandera, e Universidad a dicidi na habri su porta pa comunidad di Aruba riba e dia di fiesta nacional, 18 di maart. Pa un evento inolvidabel "Nos Patrimonio"!
Den un entrevista cu Marilou Trimon, y el a splica cu Universidad di Aruba lo bay habri portanan pa comunidad di Aruba, pa duna nan bon bini den e instalacionnan existente di e Universidad, di cual algun edificio tin mas di 100 aña bieu. Publico lo por haya sa mas di e historia di e edificionan aki, cu sigur tin un storia rico nan tras.
Durante e dia aki, comunidad di Aruba por bishita nan y disfruta di actividadnan manera exhibicion di UA su coleccion di arte, pintura di arte bibo durante dia di artistanan local, lo tin weganan educativo pa muchanan. E weganan aki lo ta basa riba estudionan cu ta ser duna na Universidad, manera ley pero nivel pa muchanan.
Tambe lo tin musica e.o. ganador di recien Festival di Cancion. Lo tin cuminda, bebida, stand di cos cushi, y tambe nan mesun Dulce di Leche cu ta wordo traha aki. Tambe lo tin entretenimento pa tur hende y mucho mas.
Dean di Facultad FHTMS, esta Sue-Ann Lee a mustra cu Dia di Himno y Bandera ta un ocasion especial unda nos por uni nos mes pa celebra nos cultura, diversidad, y e spirito vibrante di nos comunidad na Universidad di Aruba. Nan ta gradici tur patrocinador cu a haci e evento aki posibel.
Como cu esaki ta prome biaha cu nan ta organiza algo pa Dia di Himno y Bandera, nan ta spera cu publico lo reacciona y sa di atende masalmente na e actividad, cu lo ta for di 10:00 am te cu 1:00 pm, y entrada ta gratis.
