ORANJESTAD(AAN): Diadomingo dia 28 di Juli ta bay tuma lugar e evento Christmas in July y relaciona cu esaki DIARIO a entrevista Patrick Geerman, promotor di e evento.
El a splica cu e evento ta bay tuma lugar na Hadrey di Faust na San Nicolas.
El a splica cu el a wordo inspira pa organiza Christmas in July, ora cu algun aña atras el a wak esaki na Merca.
E ta un tipo di vlooienmarkt, unda cu hende por bende nan articulonan di Pasco di e aña anterior.
“Si bo tabata tin luznan cora di Pasco e aña anterior y bo kier haci cambio pa otro color, bo por bende bo luznan na e evento y cumpra otro color for di hende, of cumpra nobo ora cu esakinan ta wordo bendi bek den tienda rond di luna di October”, segun Geerman.
El a sigui bisa e intencion tabata pa bin cu e evento algun aña pasa caba, pero COVID a stroba tur cos.
“Nos ta bay tin diferente vendor, pues e ta bay bira un anochi durante di cual ta bay tin diferente stand di cuminda, di artesania, di areglonan di Pasco etc., pa asina bo drenta den ambiente di Pasco.
E evento ta bay ta di 6’or di atardi te cu 11’or di anochi.
A dicidi di organiza e Christmas in July riba Diadomingo, pasobra e ta un dia familiar, mescos cu Pasco, cu ta uni henter famia.
“Bo ta na un lugar den aire liber unda cu bo por cana rond, bay na diferente stand, busca bo cuminda of cumpra artesania etc. y pasa dushi ratonan cu bo famia”, segun Geerman, kende a indica cu Banda La Paranda, Maruba y Robert Maduro y su Alma Folklorico ta bay duna presentacion na e publico presente.
