Suplica di Fundacion E Fortaleza y Sosten pa Famia
ORANJESTAD (AAN): Diasabra 9 di Augustus 2025 venidero lo tuma lugar un gran dia pa duna material di construccion, pa asina cuminsa cu e Rehab Center pa Damas.
Actualmente Fundacion E Fortaleza y Sosten pa Famia tin 6 trailer cual mester wordo renoba y converti den Oficina, Training Center y un Cushina pa entrega cuminda na muchanan cu no tin cuminda merdia ora nan yega for di scol.
E Trailernan ta situa temporalmente riba tereno di Iglesia Aliansa Nobo, na Parkietenbos 27 wardando e traspaso di tereno door di Gobierno cual ta den man di nos Minister Rene Herde, y nos sa cu e papelnan ta den su man, y cu pronto nos lo ricibi noticia positivo, pasobra e proyecto aki ta di gran necesidad.
Pero mientras tanto tin trabao grandi cu mester wordo haci, pesey nos ta haci un yamada riba tur Hardware na Aruba y Hotelnan, pa nan por haci donacion di material, cual nos tur sa cu donacion haci na un Fundacion legalmente estableci ta deducibel for di belasting.
Pesey tambe nos invitacion ta bay na henter pueblo di Aruba, pa diasabra pasa wak e trailernan , wak e necesidad, wak kico bo por yuda cune, trece e material y asina aporta na un proyecto di gran bendicion.
Nan tin mester di Plywood ¾, SheetRock, Palo 2x6, Palo 2x4, Lodorite, Roofcoating, Coppertox, Screw 2 inch y 3 inch. Cement Board, Tubo pa awa y coriente, Joint Compound, porta, bentana, kozijn. Den un palabra bisa bin wak pa bo mes, y asina duna ta locual ta na bo alcanse.
Tin oportunidad pa haci donacion tanto online como cash. Nan cuenta di banco ta CMB Bank #65779308 cu Fundacion E Fortaleza y Sosten pa Famia.
Diasabra tambe nos ta invita tur esnan cu ta desea pa bin duna un man como boluntario, y inscribi bo mes como boluntario, sera conoci cu e fundacion, y ricibi tur informacion necesario.
No lubida riba bo petji, bril di solo, y sunblock pasobra solo ta fuerte. Lo tin handschoen y dustmask pa tur esnan cu ta duna un man cu limpiesa.
Nos lo cuminsa mainta tempran pa probecha e tempo fresco.
Si bo tin material na bo cas y bo no tin transporte yama of skirbi nan na 740-3237 (Marcel) of 661-9150 (Hairo). Of por email na: This email address is being protected from spambots. You need JavaScript enabled to view it.
Skirbi na nan bo adres corecto y e momento cu bo ta na cas. Pa asina nos por pasa y recohe e material.
Tur cuminsamento ta chikito. Pero nos ta para dilanti di un gran proyecto. Den cual nos ta conta cu yudansa di Dios y aporte di henter Aruba.
