Algun a paga 250 florin mientras otronan a paga 175 florin
ORANJESTAD (AAN) – Otro mayornan, cu no ta esnan cu diripiente, dia di inscripcion, nan a wordo informa cu suma di SKOA-geld a subi na 250 florin, mientras nan tabata paga 175 florin, tambe a tuma contacto cu nos mesa di redaccion, pa mustra nan disgusto pasobra nan si a bin ta pagando 250 florin for di momento cu nan yiunan a drenta e scol concerni.
Esaki kiermen cu no tabata tin concordancia cu e suma pasobra algun mayor a paga mas mientras otronan a paga menos, den mesun MAVO Scol. Mayornan mes por a confirma esaki papiando cu otro mayornan cu enberdad tabata pagando 175 florin y cu awo numa nan a wordo bisa cu “SKOA-geld a subi”. E mayornan cu ta pagando 250 florin pa añanan caba, por compronde e disgusto di e otro mayornan cu te awo scol ta ahusta e suma, na locual tin stipula cu sumando e 150 di aircogeld ta un total di 400 florin.
E mayornan aki no tin ningun falta, pero tin un fayo den e administracion di e scol y e pregunta cu nan tin ta, si esey lo ta tumando lugar kizas na algun otro MAVO Scol di SKOA? Y por a ripara cu ni sikiera SKOA mes tabata na haltura di e asunto aki, pasobra e directora señora Bally, durante reunion cu Formador a declara cu e suma di SKOA-geld no a subi desde varios aña atras, y cu ta keda 250 fls mas e 150 di airco geld, pues pa un total di 400 florin.
No ta por nada ta wordo bisa cu unda hende ta traha foutnan ta wordo haci, sinembargo e tipo di erornan aki ta algo cu no mester sosode. Sin duda e anochinan informativo di scolnan cu mayor ta haci hopi falta mes; den encuentronan aki cu hopi tema ta bin dilanti, situacionnan incluso di pago, lo por a wordo aclarea na tempo, evitando causa disgusto.
