Minister di Finansas a duna di conoce: --- "Kiermen loonsubsidie a caba"
ORANJESTAD (AAN): Minister Xiomara Maduro a duna di conoce durante un entrevista na Telenoticia, unda el a reacciona riba e ponencianan di e sindicatonan, cu na sosten di likides aña pasa, Aruba a haya 904 miyon florin. Hunto cu esaki a haya un fiansa apart pa por a paga e debenan internacional.
El a bisa cu di aña pasa Aruba a haya mas di 1.4 miyon florin for di Hulanda. Esaki tabata tin condicion. Aruba no a haya e placa aki por nada, a remarca.
For di e prome dia cu tabata tin hopi presion pa gobierno firma, a splica cu e condicionnan aki no ta facil y pesey a tuma hopi tempo tambe pa negocia. Pero na fin di dia esun cu tin e placa ta esun cu ta pone condicion, a expresa. Y e recorte di 12.6% den salario di e ambtenaarnan ta un condicion cu Hulanda a pone.
E mandatario a referi na e situacion di likides di Aruba na e momentonan aki. El a manifesta cu aworaki esaki ta un condicion di Hulanda pa por haya e sosten di likides. Na momento cu no cumpli cu ne, e ora no ta bay haya e fondo.
"Na e momentonan aki mes nos pais ta den e situacion caminda cu a indica nos caba cu dia 26 proximo cu Conseho di Minister di Reino tin cu tuma un decision si Aruba ta haya placa pa e ultimo kwartaal di e aña aki, dus e di 7 tranche", a bisa.
Ya caba Hulanda a indica cu Aruba no ta bay hay'e. Esey ta bay significa cu pa e luna aki no ta bay tin loonsubsidie mas. Kiermen loonsubsidie a caba na November pasobra Gobierno di Aruba no tin e likides, a expresa.
Apesar cu tin recuperacion turistico, y cu e turistanan ta laga placa atras. Pa gobierno haya e placa aki, ta bay tuma un tempo. Te cu e cosnan ta bayendo bon, Gobierno di Aruba ainda ta depende di Hulanda pa por haya e sosten di likides y pa por cumpli cu locual ta e obligacion financiero.
"Nos no ta eynan y nos ta premira cu sigur pa e proximo 6 lunanan nos ta bay tin mester di sosten di likides di Hulanda. E sosten aki ta condiciona y no ta Aruba ta esun cu ta pone e condicionnan", Minister Maduro a splica.
