Ronella Croes, CEO di ATA:
ORANJESTAD (AAN) – Ronella Croes, CEO di Oficina di Turismo, a hiba palabra durante e anuncio di e di dos fase di e proyecto recreacional na Kas Ariba.
Croes a bisa cu pa ATA ta un orguyo di por participa den e proyecto aki, cu e ta yam’e Kas Ariba, y tin diferente motibo pa haci esaki.
Durante un aña completo, Ronella Croes a bisa, ATA ta enfoca riba proyectonan cu ta bon pa Aruba su turismo pero alavez ta pensa con cada proyecto ta beneficia comunidad tambe. El a subraya cu e proyecto aki ta un ehemplo bibo di esey tambe.
“Ki ora cu nos evalua diferente proyecto, naturalmente nos ta duna prioridad na varios aspecto: kico ta importante pa nos y pa nos turismo; por ehemplo nos seguridad, nos playanan, nos medio ambiente, nos naturaleza, pero tambe promove con pa mantene nos cultura tambe. Pues, ta cosnan cu nos ta evalua ora nos ta tuma un decision ora cu peticionnan ta drenta. E colocacion di e ankel di oro, su presencia den e area aki, ta nifica basicamente, un punto pa topa. E ta un punto pa localnan topa otro, pero tambe ta un potencial grandi pa mas bishitante topa nos localnan tambe.
Y ta p’esey e fase dos ta duna mas realze ainda na e concepto cu tin tras di e anker eynan, basicamente. Pues, finalmente a yega na otro etapa pa duna e plenchi aki e punto reconocibel unda tur hende ta topa. Y nos lo sigui enfoca riba diferente aspecto cu ta bin dilanti, no solamente den Bario di Santa Cruz, pero tambe tin inversionnan en e bario di San Nicolas, na Hooiberg unda a drecha e trapi, y por menciona Ayo, Casibari unda cu tin enfoke pa medio di comisionnan riba e rock foundations, y tambe Alto Vista unda tin diferente esfuerzo cu lo dirigi nan mes riba trece e serenidad den e area aki, y respet cu tambe den e caso aki cu Capel di Alto Vista merece”, Ronella Croes, CEO di ATA a relata.
Pues ta otro ehempelnan di e liña di maneho concreto cu Minister di Turismo, entre otro, ta enfoca riba dje pa mehora e producto turistico y tambe mehora aspectonan asina aki pa nos comunidad.
Finalmente, Croes a gradici tur esnan cu a participa den e proyecto te aworaki, tambe gobierno di Aruba, Ministerio di Turismo, DOW, DIP, señor Werleman, y demas persona cu a colabora di parti di Kas Ariba tambe. “Un pabien Santa Cruz, disfruta di otro proyecto y facilidadnan cu ta na caminda, y tambe Kas Ariba”, Croes a conclui.
