Señora Sue-Ann Lee, Rector nobo di Universidad di Aruba
ORANJESTAD (AAN); Señora Sue-Ann Lee, Rector nobo di Universidad di Aruba, den un entrevista prome cu e aña academico a habri oficialmente, a duna di conoce cu den e ultimo tres aña di Universidad di Aruba, tin un crecemento leve y ta basta stabiel cu un tiki mas di 800 studiante den diferente programa. Tin algun programa cu a crece un tiki mas cu otro mientras varios otro a keda relativamente stabiel. Esaki, segun señora Lee, ta un indicacion cu tin necesidad di programa y desaroyo local. Esaki ta loke Universidad di Aruba kier brinda tambe, pa nos studiantenan local por haya e oportunidad pa studia na Aruba mes.
Pa Universidad di Aruba, e ta un logro cu pa 4 aña sigui ta conta cu tiki mas di 800 studiante mientras cu no a crece den programa, esta a mantene e mesun programanan di Bachelor. Algun Masters ta cuminsa cada dos aña na unda ta haya un fluho di mas studiante. E Academic Foundation Year ta varia di entre 80 pa 100 studiante pa aña. “En general, pa loke cu Universidad di Aruba ta brindando, nos ta unda cu nos mester ta pasobra nos no por crece mas si bo wak e facilidadnan cu nos tin y e programanan cu nos ta brinda mester toch keda balansa pa por fit in cu locual nos tin”, señora Lee a bisa.
Señora Lee a remarca cu e parti di calidad tambe ta importante pa keda mantene. Na momento cu cuminsa haya mas registracion, y e demanda bira mas grandi, mester wak con pa prepara pa esaki strategicamente pa sigui brinda e miho den educacion. Educadornan tambe di universidad mester keda educa nan mes tambe continuamente especialmente den areanan nobo di innovacion, por ehempel AI, pa sigui e calidad di educacion halto cu semper Universidad di Aruba a brinda.
