President di KWF, Haydee Henriquez:
Na april lo subi caya un biaha mas pa busca sosten di comunidad
ORANJESTAD (AAN): Pa 65 aña, Fundacion Koningin Wilhelmina Fonds Aruba (KWF) a para firme como un pilar di speransa den e lucha contra cancer na Aruba. Mediante programa di deteccion tempran, educacion publico, sosten pa paciente, y outreach den comunidad, e fundacion a sigui traha cu dedicacion. Su compromiso constante a yuda hopi bida, a fortalece hopi famia, y a crea un mentalidad di prevencion na nos isla.
Siman pasa, Presidente di KWF, señora Haydee Henriquez a indica cu Fundacion Koningin Wilhelmina Fonds Aruba a uni cu otro organisacionnan y hunto ta conduci charlanan den bario pa asina yega mas cerca di e comunidad. Entre otro, e charlanan aki ta prepara tambe nos comunidad pa ora un situacion asina presenta, nan por ta prepara y no wordo tuma di sorpresa.
Realidad di malesa cancer ta cu e cifranan anual ta mustra cu e ta sigui crece. El a enfatisa cu WKF tey pa yuda comunidad entre otro cu cama special y rolstoel. Pa e motibo aki tambe, el a remarca, cu WKF ta sigui busca ayudo y na april otro luna, lo subi caya un biaha mas pa busca sosten di comunidad.
“E necesidad pa subi caya pa busca ayudo di comunidad ta keda necesario. Nos ta gradici pa tur loke cu nos ta ricibi for di comunidad, pero e ayudo aki no ta yega den su totalidad”, Henriquez a duna di conoce.
