ORANJESTAD (AAN): Un bon noticia for di Grupo Rumannan den Oracion.
Despues di 4 siman di reapertura di nos Cas di Oracion cu tabata un exito total, caminda nan ta gradici Pastoornan y Diacono, tocadornan, personanan cu a yuda y tur esnan cu a haci un donacion. Un danki di curason pa boso colaboracion. Si ta e caso cu nos por a lubida un persona nos ta pidi disculpa pa cu esaki.
Tridium: Grupo Rumannan den Oracion ‘Beato Dr. Jose Gregorio Hernandez’ di Dakota ta bay tin un Tridium. Esaki lo ta Diaranson 20 di October, Diahuebs 21 di October, y Diabierna 22 di October 2021. E ta pa 7:00 pm.
E lo ta na Cas di Oracion di ‘Beato Jose Gregorio Hernandez’, y esaki ta situa patras di Pius X School, esta Caya Appeldam 8.
Nan ta invita tur devoto, miembronan, pueblo di Dakota y Aruba bin celebra cu un brindis chikito riba dia 22 di oktober 2021 na Cas di Oracion.
Procesion: Diamars 26 di oktober 2021 pa 6.00 di atardi e grupo ta sali for di Cas di Oracion cu un procession pa misa Virgen di Fatima. Grupo ta pidi tur persona cu no por cana, trece nan den rolstoel pa nan por asisti den e procesion y misa. Tambe tur nos devoto, miembronan, pueblo di Dakota y Aruba bin compaña nos, pa asina celebra un bunita Santo Sacrificio di misa riba e fecha natal di ‘Beato Dr. Jose Gregorio Hernandez’.
Nos ta pidi tur persona bini cu un bela blanco den glas chikito, bisti cu blusa/camisa blanco y cu carson preto y cu tapaboca.
Rumannan nos ta spera tur persona na e Tridium y tambe pa asisti na nos procession cu lo culmina cu un Santo Sacrificio di misa.
