Dahariana Evertsz di DVG:
ORANJESTAD (AAN): Riba Diasabra, 17 di october 2026, Departamento di Volksgezondheid (DVG) lo organiza e di cinco edicion di Expo Promove Salud y Bienestar. E actividad lo tuma lugar na e parkeo di DVG na Oranjestad, na e caminda antes conoci como Hospitalstraat, cu informacion y actividadnan pa personanan di tur edad.
Den un entrevista cu DIARIO, Dahariana Evertsz di DVG a splica cu e Expo lo reuni diferente departamento y organizacion cu ta contribui na salud y bienestar di comunidad. E publico lo por haya informacion tocante salud fisico, mental y oral, nutricion y prevencion.
Jeugdgezondheidszorg (JGZ) lo comparti informacion tocante e controlnan di salud cu ta wordo haci na scol, conoci como PGO. Lo tin tambe informacion di salud oral y di Gele Koorts en Muskieten Bestrijding (GKMB), cu lo enfoca riba cuido di e ambiente rond di cas pa preveni e insectonan cu ta trece malesa. DBZ lo ta presente cu informacion tocante vacunacion contra influenza y pa viaheronan.
IBiSA, hunto cu Fundashon Movemiento Ta Bida, lo coordina e parti di salud fisico. E programa ta inclui actividadnan pa stimula movimento y informacion tocante nutricion saludabel, consumo di salo y sucu, y prevencion di sedentarismo.
Fundacion Anti Droga Aruba (FADA) lo coordina e area di salud mental, cu atencion pa prevencion di adiccion y cuido di bienestar. Stichting Huntu, Precision Eye Care, Boticanan y otro organizacionnan lo contribui tambe cu informacion pa bishitantenan.
Lo tin tambe bendedornan di cuminda y bebida cu lo pone enfasis riba opcionnan mas saludabel.
Como parti di e programa, Fundashon Movemiento Ta Bida lo organiza un caminata di 5:30 pa 6:30 di atardi, saliendo y finalisando na DVG. E fondonan recauda di e caminata lo bay directamente pa e fundacion.
DVG ta invita comunidad pa bin cu famia, move y conoce mas tocante con pa cuida nan salud y bienestar. Pa informacion adicional, por consulta e plataformanan di social media di DVG y Fundashon Movemiento Ta Bida.
