Gobierno a contesta e pregunta di obhecion:
*Aruba ta scapa di un demanda grandisimo y miyonario
ORANJESTAD (AAN) – E politico y ex-minister Otmar Oduber, a yama un conferencia di prensa e discusionnan di RAft cu ta tumando lugar, di cual ya caba el a papia riba dje e siman aki. El a expresa cu e ta spera cu sano huicio ta prevalece, mirando cu e gremionan a sali tambe aworaki, y cu opinionnan di gobierno y di politiconan por uni, pa asina aki por saca e interes di pais Aruba padilanti.
Seguidamente e ex-mandatario a pidi atencion specifico, den tur e discusionnan riba aspecto financiero cu tin ta andando, riba un proyecto cu e ta considera importante pa Aruba y sigur pa e pueblo di San Nicolas, y pariba di brug, cual ta e hotel Secrets.
Manera ta conoci e hotel aki ta den publicidad, mirando cu tin casonan cu a wordo lanta contra gobierno, no contra e desaroyadornan specificamente, pero cu naturalmente, tin un impacto enorme riba nos Isla.
Oduber a señala: “Hopi biaha nos no ta para un rato keto, y awe mi tahaya hopi falta di nos miembronan di Parlamento y di otro politiconan cu ta activo pa puntra y cuestiona kico ta pasando pa cu e desaroyo cu nos tur sa, cu desde cu Lago a abandona Aruba den e añanan 85 y 86, no tabata un gobierno pero tur gobierno, cu a destina e area aki pa un desaroyo turistico, pa un hotel, y hopi tabata e intentonan cu a wordo haci door di diferente ministernan di turismo y economia.
Na e momentonan aki, nos tin un proyecto cu ta andando y lamentablemente bo no ta mira for di Parlamento, pa yama Minister, pa yama e grupo aden, pa yama esnan cu ta responsable pa mira kico ta pasando cu e hotel aki. Awe mi a compronde e bon noticia cu, en todo caso, e Gobierno, e instancia y departamentonan den e caso aki, lo a contesta e pregunta cu tabata tin den obhecion, di parti di dos bisiña di e proyecto aki, y esey ta nifica cu ta cumpli cu e veredicto di Huez y cu e proyecto aki lo por continua.
Mi ta kere cu ta cosnan importante y cu lamentablemente no ta bin afo den e discusion na e momentonan aki. Un proyecto cu a cumpli y a pasa den henter e trayectoria, cu tur permiso, y tur exigencia cu tabata tin di parti di gobierno pa ehecuta un proyecto cu nos a bin ta busca pa hopi tempo y aworaki ta para cu un menaza pa Pais Aruba, di un claim sumamente grandi y miyonario cu por tuma lugar, no pa motibo cu Gobierno ta contra e proyecto aki ni pasobra nos ta scucha di politiconan of parlamento, sea oposicion of cu ta sostene gobierno, cu ta contra e proyecto, y sigur mayoria di pueblo, vooral di San Nicolas, ta pro e proyecto pero door di dos bisiña cu a busca nan derecho, cu tin nan derecho pa busca via ley, pa salvaguardia esaki, y a buske na Corte, y awe a compronde cu gobierno a contesta esaki y cu e desaroyadornan por continua cu e trabao”, Otmar Oduber a remarca.
