ORANJESTAD (AAN) – Otmar Oduber, lider di e Plataforma Nos Pais, a bolbe vocifera den direccion di Gobierno bisando cu:
“Bo no por mata e galiña cu ta pone webo di oro pa Aruba” refiriendo na e tax di 35 dollar cu kier cobra cada turista pa crea recursonan pa financia e planta nobo di RWZI, y a mustra contento cu e intencion aki a wordo para. Toch el a bolbe remarca riba e tema.
Un par di siman pasa, ya caba Oduber a lanza criticanan fuerte contra e iniciativa aki, ora cu el a scucha Minister di Medio Ambiente bisa cu na Februari lo pasa un Ley den Parlamento, unda cu ta bay cobra 35 dollar pa cabes, na cada turista.
“El a sali y bisa na un manera incorecto y eigenlijk no berdad cu estudionan a wordo haci y hasta rapportnan a wordo traha. A resulta den mi encuentronan cu mi tabata tin cu ATIA y AHATA, y mi ta spera cu Parlamento tambe cana bishita e instancianan aki, pa scucha cu uno, no ta berdad cu a wordo traha un rapport, pero cu e hecho cu bo kier soluciona un problema creando un otro problema y un menaza pa nos turismo, cu den e caso aki ta e galiña cu ta pone webo di oro door di bay cobra 35 dollar, cu simplemente no ta hustifica”, Oduber a remarca.
Otmar Oduber a indica cu e 35 dollar aki, djis pa e parti di RWZI, lo genera mas of menos 40 miyon florin pa aña. “Bo mester puntra bo mes pakico bo mester 40 miyon florin pa aña? Ken a haci un estudio? Cual Parlamentario a puntra pa un rapport, tocante pakico e inversion ta pa mehora RWZI?
Tempo cu mi tabata minister tabata tin un rapport cu tabata bisa cu mester 27 miyon florin awo mi a tende cu mester di 200 miyon.Y si ta 200 miyon mes, esey kiermen cu den cinco aña di tempo, bo kier recupera e inversion? Pasobra 40 miyon bo kier cobra for di e turista. Kico tur ta how in? Por ta e kier mehora hopi mas structura di loke ta trata e sistema di riolering na Aruba, cu ta necesario tambe y mi ta dun’e sosten. Pero Shonnan, no ban purba soluciona un cos cabando cu lo principal cu ta tene nos na bida aki na Aruba”, Otmar Oduber a subraya.
Oduber ta puntra con por ta cu ta cobra un persona cu ta bin di Curacao mainta y ta bay anochi e mesun 20 dollar pa RWZI, cu bo ta cobra un turista cu tin tres luna di timeshare na Aruba? El a expresa cu esaki no tin logica y e falta di logica aki ta pasobra e ta facil; door cu nan a wak Otmar introduci e ley di ANSA y e ley di ATA Suigeneris. “Bo ta mata e turismo pasobra bo ta cobrando pa algo cu no ta real pa e servicio cu ta wordo brinda. Mescos pa loke ta trata Directie Luchtvaart. Pakico bo ta cobra e turista; no ta e turista bo ta dunando un servicio di inspecciona of controla avion, aeropuerto of ANSA. Bo tin di cobra e compania. Mescos cu e caso di RWZI. E hotel ta duna e servicio na e clientenan (turista), e hotel mester wordo cobra pa e por paga e servicio” Oduber a remarca.
Oduber a subraya cu e ta contento cu a para e intencion aki, pero nan tabata cla pa pasa e ley aki, y den caso di Aviacion Civil ta mescos, bo ta cobra e aerolinea y mescos cu RWZI, e hotel mester sa cuanto e ta uza den su hotel pa camber, pasobra e ora ey gobierno ta cobra riba e prijs di e camber ey. El a subraya cu logicamente si ta cobra direct na e turista, hotel ta laba su man. “E no tin responsabilidad, e no tin cu lanta su prijs, e ta keda haya su ganashi door di e prijs cu tin aworaki, y e responsabilidad ta bay directamente riba e turista”, Otmar Oduber a señala.
