ORANJESTAD (AAN) – Den conferencia di prensa yama pa e politico Otmar Oduber, awo lider di e Plataforma Politico Nos Pais,
a sigui splica cu den e yamada cu el a haci na Prome Minister Evelyn Wever Croes, pa bin cu un dialogo habri riba e tema di gastonan di gobierno, cu na su opinion ta exorbitante, tambe a papia tocante e tema di privatizacion y independizacion di departamentonan di gobierno, cu e ta pensa cu kizas e politiconan no kier mishi cu ne pasobra nan por perde voto, of ta hendenan cu tin famia grandi den gobierno.
“Nos a mustra cu den pasado caba cu por haci esaki sin cu hendenan ta perde trabao, pero cu ta haci’e eficiente y efectivo, y ta baha drasticamente, gastonan di gobierno”, Oduber a señala.
Tambe nan a papia di edificionan di gobierno, casi 30 cu ta den ruina na e momentonan aki, cu por drecha nan y cu por genera entrada pa pais Aruba, pero simplemente ta prefera sigui huur, bay den edificionan nobo sin cu tin un plan di mantenimento pa nan, pasobra esey ta e problema mas grandi.
Segun Otmar Oduber, esaki ta e tipo di problema cu mester sinta hunto na mesa awe, y e ta reitera cu no ta necesario pa introduci ningun clase di medida mas pero trece alivio den comunidad y reduci un cantidad di gasto.
