E tabata reacciona fuerte riba preguntanan di Hof
ORANJESTAD (AAN): Dialuna di mainta te 5.30’or di atardi, Hof di Corte Superior a tuma pa cuminsa cu tratamento di caso Flamingo den apelacion. Por a nota cu Otmar Oduber tabata reacciona fuerte riba preguntanan haci door di Hof. Na dado momento Oduber a bira hopi emocional y a pidi Hof disculpa pa cu forma di actua. Na yoramento e tabata expresa su duele y alavez rabia cu siman pasa el a dera su mama q.e.p.
El a reclama si Hof cu no ta husto cu pa añanan largo e ta bibando den incertidumbre. Por a mira e expresionnan di Oduber a efecta Hof. E tres miembronan di Hof a expresa palabranan di condolencia y a dicidi di pospone e caso un rato pa asina Oduber por recupera. E abogadonan mr. Carlo y mr. Ellis a bay consola Oduber.
Por a nota cu e Procurador General (PG) anterior, kende na 2024 tabata e Fiscal cu a atende caso Flamingo, a bolbe Aruba pa atende como PG e caso den apelacion y ta wordo asisti pa un Fiscal
Caso Malmok: Hof a cuminsa cu e caso Malmok, caminda ta sospecha Oduber y e dama Wever ta envolvi. E acusacion ta cu Oduber a malversa Gobierno door di otorga dos tereno na Malmok mientras cu Wever lo a falsifica cartanan. Hof ta referi aki na dos peticion pa tereno di e homber F. y e dama C. Oduber a reacciona cu e no a malversa y cu henter e proceso a bay segun e maneho nobo cu a keda estableci.
Wever a bisa cu e no ta di acuerdo cu e acusacionnan. El a bisa cu el a sigui orden di Oduber como Minister. Oduber a bisa Hof cu e tabata Minister cu a bin cu cambio den e maneho di dunamento di tereno, caminda a bin cu reglanan. E ta orguyoso di bisa cu e 2 añanan cu el a hiba maneho, tur cos a bay hopi bunita y hasta despues.
El a desmenti cu el a favorece cualkier persona pa haya tereno. Hof a mustra cu Oduber a acerca Wever pa bay traha cun’e como coordinador di e grupo encarga cu dunamento di tereno. Oduber a bin cu maneho nobo pa cu dunamento di tereno. Tin un procedura cu mester sigui pa por yega na haya tereno. Oduber a mustra cu antes hendenan tabata bay na oficina di Gobierno pa pidi Minister pa haya tereno. Cu a maneho nobo, minister no tabata envolvi. Tur cos tabata via maneho DIP y masha poco Oduber tabata envolvi den dunamento di tereno.
Hof a puntra cu ora un hende haci peticion, con e proceso ta bay. Wever a splica cu e departamento a bay check tur e peticionnan pendiente y a averigua si nan no haya ainda. Nan ta haya un pre reservacion y despues e persona lo mester presenta finaciamento pa cu e construccion di e cas. Na final ta e director di DIP ta firma. Oduber a splica cu e ta firma ora tereno mester keda otorga.
Excepcion den Maneho di Tereno: Hof a mustra cu e homber F. y e dama C. no a sigui e procedura. Oduber a splica cu tabata un excepcion den e maneho. E maneho tabata dirigi pa construccion di casnan. Na dado momento no tabatin tereno chikito mas pa construccion. E mayoria di e terenonan tabata entre 330 y 500 meter cuadra. Tereno mas grandi tabata dificil pa hendenan haya financiamento pa construccion di cas.
Oduber a sigui splica cu tabatin terenonan individual mas grandi y den reunionnan cu tur departamentonan envolvi a dicidi di otorga esakinan tambe. A bin cu e maneho cu esun cu yega promer cu e financiamento y plan, ta haya e tereno. Hof a remarca cu tin un parti di e maneho cu Oduber ta papia dje, no ta skirbi den e maneho. Aki ta papia di e maneho di excepcion. Ademas no a publica esaki.
Abogado mr. Odor di Wever, a presenta na Hof cu e maneho cu Oduber a papia di dje, ta poni riba papel di December 2020 y a entrega Hof esaki. E documento aki, ni Hof ni , ni PG tabatin conocemento di dje. Hof a dicidi di lesa esaki.
Hof a mustra cu Wever a indica cu Oduber a manda peticion p’e pa haci cambio di maneho pa hendenan cu no ta bin na remarke. Oduber a desmenti esaki categoricamente. El a bisa cu cada peticion cu e haci, lo mester cana henter e procedura. Hof mustra cu 2 Apri 2014, e homber F. a haci peticion pa tereno. 6 Mei 2014, e peticion ta bay serca Oduber y 7 Mei e peticion a bay DIP. F. ta conoci cu e homber M., kende ta amigo di Oduber. M. a acerca Oduber pa tereno na Malmok. Oduber a bisa cu e ta bon amigo cu M, kende ta pareha di C.
Oduber a yora: Na dado momento Oduber a bira emocional y a cuminsa yora mustrando cu recien su mama a fayece y a wordo dera. El a bisa Hof cu tabatin un reunion cu e departamento caminda a dicidi cu e 4 terenonan disponibel na Malmok lo wordo otorga na cuater persona entre otro F. y C. Oduber a enfatisa cu nunca el a haya hende na su oficina cu peticion pa tereno. Hof a keda haci preguntanan y na dado momento Oduber a pidi Hof disculpa cu e ta bira emocional y a bisa cu recien el a dera su mama. El a cuminsa yora y bisa cu tur cos ta traha riba dje. Hof a expresa palabranan di condolencia y a pospone e caso pa algun minuut pa asunto Oduber por trankiliza.
Falsifica cartanan: Despues Oduber a bisa Hof cu Hof ta haci’e preguntanan manera cu el a duna instruccion pa duna tereno y esey no ta corecto. El a enfatisa cu e 4 departamentonan tabata encarga cu henter e proceso di screening cu e persona y resto di cosnan. Wever a splica cu ta durante reunion a keda dicidi na kende e terenonan ta wordo duna.
Oduber a bisa Hof cu enberdad el a ripara cu tabatin un fayo haci den decision tuma den reunion y el a instrui Wever pa haci cambio den e reparticion di tereno. El a bisa cu el a rabia cu a tuma decision den e reunion y ta bin cambia e decision. El a bisa cu door di a haci cambio pa tur cos cana bon, awor ta bin cu cantidad di acusacion contra dje.
Empleadonan fantasma: Hof a mustra cu Oduber a tuma Phillips y Tiel den servicio y firma acuerdo. Ta sospecha cu Oduber a malversa Gobierno cu e acuerdonan aki door cu e dos personanan aki no tabata traha pa Gobierno. Tambe cu Oduber a haci mal uso di su autoridad como Minister. Oduber a bisa Hof cu tur esaki no ta cuadra cu e berdad. El a bisa cu e henter e proceso ta igual cu tur e otro personanan cu el a tuma den servicio o sea via DRH (Departamento di Recurso Humano). El a bisa Hof cu ta normal cu Minister ta scoge e hendenan cu e kier pa traha p’e. El a bisa cu Phillips y Tiel realmente a traha p’e. E ta haya cu e acusacion aki no ta berdad. Hof a bisa cu e acuerdonan ta mustra real pero e unico cos ta, cu no ta poni ki funcion nan tin.
Cuestiona Marisol Tromp: Na final di Oduber su carera, tur dos a wordo kita pasobra Marisol Tromp cu a ocupa e funcion di Minister no ta haya cu nan tabata cumpli pasobra nan no a traha. Oduber a bisa cu ta DRH a traha e acuerdonan y e acuerdonan aki ta wordo usa door di tur Gobierno. El a garantiza Hof cu Phillips y Tiel a traha debidamente. Hof a mustra cu Marisol Tromp a laga sa cu Phillips y Tiel no tabata presenta pa traha. Hof a bisa cu ta papia di trahadornan fantasma.
Oduber a reacciona cu ta solamente Marisol Tromp cu a wordo cori for di partido y Gobierno, a bin cu e acusacionnan aki cu no tin base. El a bisa cu tin diferente persona cu a bisa cu Phillips tabata traha cu otronan. Hof a mustra cu den un caso civil, Hues a cuestiona e acuerdo di trabao y a bisa cu e acuerdo no ta admisibel. Hues a bisa cu Tiel y Phillips no merece pago pasobra ta considera esaki patronahe politico. Oduber a bisa cu e ta lamenta esaki pasobra e no a wordo scucha den e caso ey. Oduber a bisa cu ta DRH a traha e acuerdo y stipula nan salario.
Esser sospecha di abusa di su funcion: Hof a bisa cu Esser a yuda pa laga hende bay traha na DOW y Serlimar. Ta sospecha cu Esser a abusa di su funcion. Tambe cu Esser a wordo cumpra door di Vito Croes. Esser a splica Hof cu e tabata atende publico y tabata yuda hende den traha carta y ta wordo registra. Despues e cartanan ta bay pa e hefe di personal cu ta percura pa e cartanan yega na e departamentonan concerni. Hof a bisa cu Oduber tabata considera Esser hopi importante. Segun Esser, e no tabatin contacto cu Oduber. Hof a mustra cu ta sospecha cu hendenan liga cu partido di Oduber, Esser tabata yuda pa haya trabao na Serlimar y DOW.
Hof a bisa cu Polis a haya logbook di informacionnan di Esser y computer for di Marisol Tromp. Den e logbook a pone informacion di tur hende cu tabata bay busca trabao. Segun Esser e no conoce hopi di e hendenan. Segun Polis, e mayoria di e hendenan ta hendenan cu ta sosotene partido POR. Segun Esser esey ta pensamento di Polis. El a bisa cu el a trata tur hende igual. El a atende pa hendenan di tur partido igual. El a bisa cu e hendenan tabata bisa cu nan lo vota pa Otmar y e tabata skirbi esaki patras di nan nomber den e log book. El a bisa cu esey no kiermen cu nan ta campañador of votador di POR.
Hof a puntra Oduber cu si el a percura pa su hendenan haya trabao na diferente departamento. Segun Oduber, tur hende cu el a manda a bay via procedura normal. El a splica cu e directornan di companianan tabata haci peticion y esakinan tabata wordo trata y asina e hendenan tabata haya trabao. Tur cos tabata bay via DRH. Oduber a bisa Hof cu tur hende cu el a propone pa traha, a wordo gescreen promer cu a bay traha na Serlimar.
Abogado mr. Carlo di Oduber a pidi Hof pa check declaracion di e directornan di companianan si nan a wordo presiona door di Oduber. Hof a lesa e declaracionnan caminda ta mustra cu e directornan no a wordo presiona sino cu a sigui e procedura normal y a tuma nan.
Wordo cumpra: Hof a mustra cu Esser ta wordo acusa di a wordo cumpra door di Vito Croes. Segun e acusacion, Esser lo a haya placa di Vito Croes y a cambio a duna Vito Croes trato preferencial.
Esser a desmenti esaki categoricamente. Esser a splica Hof cu Vito Croes ta padrino di su yiu y tabata paga pa school di e yiu. Esser a sigui bisa cu ora e haci aña y pasco e tabata haya regalo for di famia Croes. Fin di aña e tabata haya un bono pa haci compras na un supermercado. El a bisa Hof cu ta Croes y su señora a dicidi di paga school pa su yiu y esey a caba na 2016. Esey no tin nada di haci cu e caso aki. Hof a mustra whatsapp entre Croes y Esser caminda ta papia di placa den envelope y pa corda papia cu Otmar tocante DOW.
Segun Esser, Croes tabata cumpra carchinan di BBQ pa teamnan recauda fondo for di Esser. E asunto di DOW, el a splica cu Vito Croes tin un proyecto pega na DOW desde 2015 y tabata kier wak si Oduber por yuda. E hefe di personal a bisa Esser pa bisa Vito Croes atende cu e director di DIP ya cu Oduber no por yuda.
Esaki tabata e comienso. Awe ta sigui cu e requisitorio di Procurador General, kende lo bay bisa kico e ta pensa di e caso y ki castigo e ta exigi.
