Geoffrey Wever:
ORANJESTAD (AAN): Tabata un honor y placer pa Sr. Geoffrey Wever, Minister di Asuntonan Economico, pa duna un discurso durante e inicio di e O'STAD200 Incubator cual a tuma luga diasabra ultimo.
Durante su presentacion, Minister Wever a pone enfasis riba e trabou, vision y oportunidadnan cu e ministerio di asuntonan economico ta dedica na dje den colaboracion cu sector priva, pa asina logra mas innovacion y progreso pa Aruba. Minister Wever a expresa su gratitud na tur e stakeholders, organisadornan y participantenan, mencionando cu solo cu determinacion y cooperacion ta posibel pa logra un cambio real.
E O'STAD200 Incubator ta un plataforma duradero di desaroyo empresarial, cu ta un paso clave pa start-ups y scale-ups den nos comunidad. Cu tayeran di guia y oportunidadnan pa gana premio, e incubator aki ta enfoca riba busca solucion pa retonan specifico den mercado, door di evalua cada idea empresarial y den caso cu ta presenta un solucion real, cu esaki por ser ehecuta.
Den reunion reciente hunto cu e team organisador di O'STAD200 Incubator, Minister Wever a topa cu varios di e oradornan internacional cu a participa den e summit titula "Scaling up our Future." Aki a discuti e vision comun pa avansa e sector di Fintech y Inteligencia Artificial den nos economia, cu enfoke special riba con e programanan aki ta stimula crecemento economico y desaroyo tecnologico.
E "O'STAD200 Incubator Summit" cu a tuma luga diasabra ultimo, tabata un evento di un dia completo, caminda oradornan local y internacional a comparti informacion valioso riba temanan importante manera Automatisacion Empresarial, Seguridad Cibernetico, Fintech, Machine Learning, y Inteligencia Artificial.
Minister Wever ta enfatisa cu den su maneho, nan a dedica pa empodera tanto e empresarionan actual como esnan futuro, pa e sector empresarial sigui crece y contribui na un Aruba mas prospero. "Nos ta spera cu esaki ta solamente un inicio di un dialogo continuo pa mas progreso y innovacion."
{gallery}OSTAD 200 Incubator, un programa duradero pa empodera start ups y scale ups{/gallery}
