Judelca Briceño, director suplente di DVG:
ORANJESTAD (AAN) E siman aki DIARIO a entrevista señora Judelca Briceño, director suplente di Departamento di Salud Publico, tocante e Conferencia DuCaPHen 2026, cu ta tumando lugar na Aruba como anfitrion e aña aki.
Manera ta conoci esaki ta un conferencia na unda expertonan den Salubridad Publico di e region di Caribe Hulandes, esta Aruba, Curacao, Bonaire, Sint Maarten, Sint Eustatius, Saba, y Hulanda ta bin hunto. Señora Briceño a comenta cu e siman aki ta bay ta tratando temanan cu tin di haber, entre otro, con pa prepara nos mes si surgi un calamidad riba tereno di Salubridad Publico.
“Eigenlijk, esaki ta un conferencia cu anualmente ta wordo organiza, y e aña aki ta na Aruba pa dirigi e conferencia aki. Nos ta orguyoso cu nos tin, en total, 108 participante, cu a bin for di tur e region pa representa nan ministerio, nan departamento, y pa duna curso y haci compromiso pa Salud Publico regional”, e funcionario di DVG, señora Briceño a señala.
El a splica cu actualmente ta presente ministerionan, departamentonan, pero tambe expertonan cu ta trata, specificamente, temanan riba tur nivel di specialismo cu tin di haber cu Salubridad Publico.
“E siman aki, e idea ta cu nos ta bin cu un agenda cu diferente iniciativa, y despues di tur e presentacionnan nos ta wak kico tur e paisnan tin den comun, cu nan lo mester traha riba dje, conhuntamente”, Judelca Briceño, a indica.
“Tin otro retonan cu nos mes, cada pais riba su mes, lo sigui cu ne. Pero e ora ey nos lo prepara e agenda pa e aña venidero, cu kico tur ta e proyectonan cu nos ta bay carga hunto como region Hulandes”, señora Briceño a señala.
El a subraya cu actualmente e reto mas importante ta, cu si tin un “crisis management” tin cu negocia. “Mundialmente tin un scarcedad riba tereno di expertonan den salubridad publico, y na momento cu bo tin un crisis mester argumentonan pa reacciona di inmediato, y esery ta e challenge. P’esey danki na e colaboracion y ‘DuCaPHen’ cu e plataforma aki, nos por ta habil den e proceso di bisa cual pais tin cual necesidad, pa e expertonan por move debidamente”, señora Judelca Briseño, Director Suplente di DVG, a splica pa conclui.
