Hoben pidi fondo pa bo proyecto dedica na hoben!
ORANJESTAD (AAN): Hobennan entre 12 te cu 29 aña den Caribe hulandes por pidi fondo cerca Oranje Fonds pa nan proyecto social. Mediante Impulsfonds Verschilmakers: Jong! Oranje Fonds kier stimula hobennan pa traha na bienestar di otro hende y pa un comunidad mas social.
Participacion di hoben riba tereno social ta crucial y di balor incalculabel pa por genera mas conexion den comunidad. Pa lanta un generacion nobo di promotor di iniciativa social, Oranje Fonds y Ministerio di Enseñansa, Cultura y Ciencia (OCW) ta ofrece financiamento pa proyecto di hoben pa hoben. Si bo ta entre 12 pa 29 aña por haci peticion pa un suma di AWG 1.000 te cu 4.000, cerca Impulsfonds Verschilmakers: Jong! Aki un panel di hoben lo evalua e peticionnan.
Aporte positivo
Oranje Fonds ta buscando hoben cu kier start un proyecto cu ta duna un aporte positivo na comunidad y cu ta di balor pa otro hende. Pa mas informacion, riba tur e criterianan y pa e formulario di peticion, Abo hoben por bay na www.oranjefonds.nl/hey-verschilmaker-cariben.
Panel di hoben
Un panel diverso di 12 hoben lo evalua tur peticion. Ta hobennan cu conoce e contexto social y economico riba e islanan y esaki ta haci c unan por tene debido cuenta cu e perspectiva Caribense ora di evalua e peticionnan di proyecto. Fecha pa evalua proyecto ta Juni, September y November. E hobennan tin te 1 di Juni 2025 pa entrega nan peticion pa e siguiente ronda di evaluacion, cu lo tuma luga den luna di Juni.
Tocante Oranje Fonds
Oranje Fonds ta traha na fabor di un comunidad den cua nos ta cuida otro, unda hende tin oportunidad igual y ta sinti nan conecta cu otro hende den nan bario. Oranje Fonds ta logra esaki dunando sosten na iniciativa social den forma di efectivo, conocemento y un red di contacto.
