Hefe di Ambulance ImSan, Liberato Hoek:
ORANJESTAD (AAN) – Servicio di Ambulance semper t’ey pa duna e cuido medico na momento e necesario. Asina Hefe di Ambulance, Liberato Hoek, a enfatiza den entrevista cu DIARIO. Servicio di Ambulance ta ricibi un average di ocho mil yamada pa aña, loke pa un Isla chikito ta hopi. “Pero di e ocho mil yamadanan aki casi 400 ta wordo cancela, sea prome cu nan yega na e adres of ora nan yega, e persona ta bisa cu no mester ambulance mas.
“Por parce cu 400 melding no ta hopi, djis pensa riba e presion cu e 400 yamadanan ey ta pone, por ehemplo, riba e trafico pasobra na momento cu nan yama nos, e ta algo urgente. El trafico tin cu coopera y ta keda bao stress, anto pa ora bo yega nan bisa bo cu no tin mester. Esey ta un parti hopi fastioso pa e riesgo cu nos ta hinca nos mes den dje”, Liberato Hoek a declara.
El a bisa cu locual ambulance ta pidi ta autonan riba camina baha nan velocidad ora ambulance ta biniendo, no pa chauffeurnan subi riba acera. “Si bo tin espacio pa hala, bo ta hala, pero solamente si bo baha bo velocidad, ambulance mes ta busca su forma meymey di e trafico”, Liderato a splica.
Importante ta cu e trafico cu ta dilanti di ambulance fiha su bista riba dje, na momento cu e chauffeur ta na stuur wak na su spiel, pa e sa cu tin un ambulance su tras of cerca di dje”, Liderato Hoek a señala.
Otro aspecto ta ora e chauffeur cu ta den trafico ta scucha musica y e no por scucha e sirena di e ambulance.
“Cu earphone ta peor ainda pasobra bo ta bay scucha nada mas cu bo musica den bo orea. Loke por wak cu pasa ta cu ora na mira cu ambulance ta cerca di nan, e ora ey nan ta spanta y esey ta fastioso, pasobra mester bay man robes of hala un banda, cu bo no ta suppose di hala, simplemente nos ta pidi pa baha bo velocidad”, el a reitera. Esey ta e miho cos cu tin na lugar di break para meymey di caminda.
