Interesnan scondi ta hunga directamente cu porvenir di e pais --- *Den un emergencia mundial no tin espacio pa mala fe --- *Expertonan y solucion silencia pa bobedad por sigui destrui
ORANJESTAD (AAN) — 2022 a bira un momento crucial pa futuro. Futuro ta den man di hende den tur aspecto.
Den e guera contra Covid-19 hende ta ocupa e lugar principal. Den creacion di e futuro nobo, hende ta dicidi.
Con humanidad lo ta na final di Siglo 21ta un pregunta grandi cu no solamente ta depende di e forma cu a atende cu cambio di clima, Covid-19, combustibel nobo.
Con humanidad lo ta na final di Siglo 21 ta depende na prome lugar di e moral cu tras di actuacion di tur cu ta yama nan mes lider y cu mester percura pa Pueblo por sigui cana den un futuro sumamente dificil.
Un periodo historico cu mester a introduci cantidad di cambio riba plataforma mundial, a wordo influencia tambe pa e coronavirus nobo.
Conocemento humano y liderazgo nacional na tur pais, mester ocupa su mes tanto cu e derota of e forma pa haci posibel cu hende por sigui biba cu e virus den situacion di endemia, como cu e asuntonan basico pa un comunidad sobrevivi.
Por papia di un situacion mundial den cual ta parce cu ta for di tur angulo hende ta wordo ataca y pusha den lama bruto cu ta bira peligroso si no tin auxilio di conocemento, guia y fe pa confronta olanan di atake.
E momento aki no por wordo uza, pa hende cu mester laba nan cara y imagen pa deshaci di berdad cu ayera a laga atras, manipula cu e formulanan necesario pa hiba e comunidad na un futuro nobo, cu mester ofrece trabou, pan, expertonan hoben, construccionnan, oportunidadnan y aliento nobo pa un comunidad mundial nobo.
Na Aruba por nota con expertonan cu ta haci nan trabou, ta wordo silencia of ta wordo kibra dor di hende cu no ta ni na haltura di loke nan ta papia.
Un circo den cual cabay pata kibra ta central, ta pone futuro di Aruba na riesgo.
Cada oportunidad cu nan haya, por nota con interesnan scondi ta stroba Aruba di alcansa solucionnan pa problemanan cu no por laga sin solucion.
Liderazgo di e pais mester concentra riba contenido di su trabou.
Den nos ultimo presentacionnan nos a splica kico a laga Aruba manera un mucha maltrata na 2017, ora ya Aruba a drenta Cuido Intensivo financiero, economico y social.
Nos a resumi loke a pasa ayera cu Aruba pa asina den construccion di e futuro nobo, evita e erornan grave cu a bira peso na pia di Aruba cu mester sigui cana.
Un aire di negativismo ta wordo crea dor di cabaynan pata kibra den e circo di bobedad, cu ta hunga cu sabiduria cu ta wordo pusha den nan boca dor di amonan y cu nan mes no por comprende.
Caymannan na boca di rio no ta visibel. Nan ta sconde mientras nan colonia di bobedad cu a probecha di tur loke nan por a probecha prome cu 2017, ta destrui aliento di Aruba.
Ora analisa e realidad actual di Aruba, ta mira con e grupo cu kier contribui na solucion pa futuro y ta capaz pa haci esaki, den tur sector ta wordo silencia pa asina e voz di bobedad por plama negativismo barata y stroba Pueblo di haya aliento pa enfrenta un futuro dificil.
Aruba ta enfrenta un futuro dificil, cu sinembargo mester tin espacio y oportunidad pa e generacion cu no ta hunga hoben, pero cu ta hoben y lo mester biba cu e realidad di futuro di e pais.
Mester deshaci di e huma di negativismo cu ta wordo produci pa asina Pueblo no ripara con sabiduria, conocemento, pasonan positivo pa recuperacion di Aruba ta wordo mata pa asina habri caminda pa regreso di circo di cabay pata kibra cu ayera a hiba Aruba direccion di abismo.
