Mundialmente alarma ta wordo bati pa un fenomeno peligroso
*Mundo ta bati alarma grandi pa un peliger creciente den cas
*Mamanan ta yora morto di nan yiunan ataca den nan cas
ORANJESTAD(AAN) — Na ki momento sentimentalismo ta bira peligroso? Esaki ta e nucleo di e topico cu nos ta presenta awe despues di miedo expresa na Aruba y alarma cu ta bati rond mundo.
“Cacho ta mi mihor amigo,”ta uno di e balornan cu hopi bez a acompaña e les di bida cu hende ta entrega na otro.
E ta uno di e topiconan sumamente dificil pa atende hustamente pasobra e ta trata di algo sentimental, loke ta haci e peligro cu e ta forma mas grandi.
Na ki momento por papia di hende, bestia of cualkier parti di naturalesa como nos mihor amigo?
E Arubiano generalmente stima laman. Pero e ta bon na haltura di e peligro cu e ta enfrenta si e dicidi di bula for di un baranca den e olanan bruto pa Noord di Aruba.
Ora sentimentalismo domina hende, e ta conduci na peligro pasobra e ta stroba hende pa pensa y razona segun su inteligencia.
Cacho como protector di hende, ta un realidad grandi. Hende a mira den cacho un defensor na momento di peligro. Un amigo incondicional.
Cu tin cacho sumamente peligroso, semper tabata conoci y e razanan aki tabata wordo uza na momento cu kier a destrosa otro.
Den nos tempo moderno cu criminalidad a aumenta, presencia di cacho na casnan a recobra forsa rond mundo, na momento cu situacionnan mundial di guera y atrocidad creciente, ta crea cerca hende mas e anhelo y necesidad sentimental.
Un cacho pa hopi hende ta un bon amigo y compania grandi.
Tur cos den mundo tin su otro banda. Tur hende por ta un bon amigo. Pero mescos cu tin hende manso, hende amabel, tin hende peligroso cu mente destructor.
Leynan nobo ta wordo introduci continuamente y Aruba tambe a conoce Ley cu ta proteha hende parcialmente contra cierto tipo di cacho.
Nos ta bisa parcialmente pasobra mundialmente ta surgi e pregunta, si no ta bira tempo pa dicidi cual rasa di cacho por wordo permiti di por cana libremente den casnan of riba tereno priva y cual tipo di cacho, mester wordo considera fiera, animal sumamente peligroso cu mes peligro cu por ehempel un tiger.
Storianan espantoso ta wordo presenta tur dia na mundo.
Mamanan cu ta bay bishita hende cu nan yiunan y ta termina den santana na graf di e mucha.
Hende, cu a wordo mutila y a keda paralitico, ciego of cu cualkier otro problema fisico pasobra nan a wordo ataca dor di cachonan den cas di famia.
Rond mundo, abogadonan ta specialisa nan mes riba e tereno aki debi na casonan cu ta wordo presenta den Corte.
Den investigacionnan cu DIARIO ta haci, por topa mas y mas cu e pregunta, si no ta bira tempo pa prohibi cierto tipo di cacho den cas di familia y exigi pa nan wordo catalogisa como fiera cu igual peliger cu un tiger, un leon, pues un animal feroz.
E tema no ta nada facil ya cu aki ta atende cu algo sentimental.
Pero ora mira e cantidad di bida di hende na peliger, alarma ta wordo bati rond mundo cu ta registra mas y mas victima cu inocentemente den cas di un famia, ta topa cu nan desgracia.
Peor ta bira e cantidad di casonan di mayornan cu ta permiti cacho peligroso atende cu nan yiunan, sin tene na consideracion cu cualkier momento nan yiu por wordo confronta cu morto.
E realidad cu DIARIO ta presenta awe, ta exigi atencion ya cu hende ta depende tambe di loke e ta mira como algo moderno sin mira realidadnan peligroso pa nan mes y otro hende.
Cacho ta un amigo di hende. Sin duda un berdad. Pero mescos cu hende por bira un peligro pa animal, animal por bira peligro pa hende.
Mundo a cuminsa bati alarma serio pa cacho cu mester considera fiera. Cifranan ta papia.
Con ta enfrenta un problema serio, marca pa e realidad moderno di un mundo material, cu a haci cu tin hende cu ta prefera un animal riba un hende como compania?
E capacidad inteligente di hende, tin e contesta!
