ORANJESTAD (AAN): Tocante e asina yama 'ABC Bubble' (esta Aruba, Bonaire y Curacao), Sharline Koolman di Departamento di Salud a indica cu DVG ta pidi esnan biba na Aruba, pa print e certificado cu nan ta haya den e “Aruba Health App” ora cu nan a aplica tur dos vacuna.
Un persona no ta haya e certificado aki si e tin solamente un vacuna. Pero esun cu a haya Covid-19 den e seis ultimo lunanan y tin un vacuna, esaki tambe ta conta pe.
Un vez cu un persona a haya Covid, esey ta conta como un vacuna y e di dos vacuna ta bira e ora ey, cu e persona ta completamente proteha y por viaha entre e tres islanan Aruba, Bonaire y Curacao.
Sharline Koolman a agrega cu esnan cu viaha semper por pidi via e call center di DVG un asina yama “Fit to Fly Letter” y alavez e persona por presenta na un di e localidadnan di vacunacion, y mustra nan ki dia e tabata malo y e por haya e carta ey tambe.
Normalmente, den e Aruba Health App, ora e persona tin un account cu nan ta haya “Case ID” eynan mes por mira ki dia e persona tabata malo y ki dia el a haya su vacuna. Esey tambe por uza ora di viaha entre e islanan.
