Señora Romely Flanegin, Directora di Tienda di Educacion
ORANJESTAD (AAN); E Fundacion Tienda di Educacion, specialmente ta atende cu famianan cu tin yiunan di 0 pa 18 aña cu e meta pa yuda famianan den nos comunidad busca e miho structura den educacion y desaroyo en general. Directora di Tienda di Educacion, señora Romely Flanegin ta splica DIARIO cu un di e problemanan mas grandi ta cu no tin balansa di e tempo den famia.
Factornan cu ta hunga un rol den esaki ta e parti financiero cu ta pone mayornan traha pafo di cas, tin biaha mas di un trabou, y no tin e tempo pa pasa den famia y pa cria nan yiunan. Señora Flanegin a enfatisa cu si no tin tempo pa yiunan, esaki lo afecta tur otro area den bida di e yiu, entre otro problema di concentra y participa na scol.
Tienda di Educacion ta enfoca pa yuda mayornan cu guia y recomendacionnan con pa trece balansa den cumpli cu e parti financiero mientras cu ta cumpli cu e obligacion como mayor. Pero si e mayor no ta na cas, no por realisa esaki. Mientras cu Tienda di Educacion ta buscando manera pa trece e balansa, mayornan mester comprende cu nan tin e deber como mayor, pa haci e criansa di nan yiunan y duna enfoke riba educacion y desaroyo. Scol ta importante y tambe ta hunga un rol den esaki, pero e base ta cuminsa den e hogar.
“Esaki ta loke nos kier pa mayornan realisa. Ora cu nan ta pone un fundeshi fuerte, e muchanan ta resalta na scol, den deporte entre otro. Pero si na cas e fundeshi no ta manera e mester ta, e ta bay tin efecto riba tur otro area social cu e mucha ta participa den dje”, señora Flanegin a enfatisa.
