Señor Ivo Valdes (OPPA):
ORANJESTAD (AAN) –Presidente di e Organisacion di Pensionadonan Publico Arubano (OPPA), Señor Ivo Valdes, a lansa preocupacionnan fuerte tocante e situacion actual di cuido pa adulto mayor na Aruba.
El a indica cu cosnan no ta bayendo bon na Aruba pa loke ta trata cuido di nos adultonan mayor. Ainda tin un lista grandi di espera na e centro di cuido SABA y ta trata di hendenan cu tin necesidad di cuido permanente. Casnan di cuido priva tambe ta enfrentando hopi obstaculo, segun señor Valdes.
“Tin falta di casnan di cuido na Aruba. Enbes cu Gobierno bin cu un maneho structura pa yuda e hendenan cu tin cas priva, pa drecha loke cu Gobierno ta pidi, e ta tranca e situacion na moda cu e hendenan aki ta bay stop di cuida e hendenan di casnan di cuido priva pasobra nan ta haya hopi contratempo. Y esey no ta e idea. Mi ta spera cu Gobierno bin cu un maneho vooral pa e hendenan grandi pasobra mester bin un cambio riba locual ta trata nos grandinan”.
Señor Valdes ta haci un apelacion na Gobierno di Aruba pa yuda nos grandinan teniendo na cuenta cu hasta gobernantenan ta bira grandi un dia. Placa di pensionado no ta yega specialmente pensionadonan cu ta malo di salud.
Por lo tanto, Gobierno mester haci un bon evaluacion ken realmente lo tin cu haya un aumento di pensioen of reparatie toeslag cu gobierno tin pensa di duna pa garantisa un trato husto pa tur. “A pesar cu tin pensionadonan cu tin dos pensioen, no kiermeen cu nan no merece of mester haya reparatie toeslag. Pasobra no ta tur pensionado ta den mesun situacion”, señor Valdes a conclui.
