Ivo Valdez:
*"E situacion di nos grandinan ta hopi teribel akiriba"
ORANJESTAD (AAN): Ivo Valdez, Presidente di OPPA, organisacion cu ta representa e pensionadonan publico na Aruba, a duna di conoce cu for di Januari 2021, nan a manda diferente carta pa gobierno, pero el a selecta rond di 8 carta cu ta esunnan cu nan ta haya mas importante pa trece cierto asuntonan dilanti.
Valdez a sigui bisa cu dia 22 di Januari 2021 a manda un carta riba maneho riba cuido medico y AZV, e lista positivo di remedi. Dia 17 di Januari 2022, a manda un 'rappel brieven' di OPPA refiriendo e reduccion di 'gelijkbegrag' y 'overheidspensioneel' y tampoco nan a haya un contesta.
El a indica cu asina nan a sigui manda mas carta refiriendo na diferente preocupacion cu e pensionadonan tin manera 'gelijkbedrag' y 'bashipremie', pero nan no a haya contesta te un dia cu Prome Minister a bis'e cu gobierno no tin espacio pa duna e cen ey bek.
Tocante cuido medico tampoco gobierno a duna OPPA un contesta satisfactorio. Mientrastanto, ainda e pensionadonan tin cu paga nan remedinan cu AZV no ta cubri, a remarca.
Valdez ta di opinion cu e maneho di gobierno ta fiha riba e trahadornan y e gremionan comercial. Mientras cu tin 25 mil pensionado eyfo. Ta manera 25 mil hende di e poblacion aki no tin nada di bisa.
OPPA a pidi na februari 2022 pa bin cu un 'ouderenraad'. Na Augustus 2022 a bolbe manda un carta pa OPPA reuni cu gobierno riba maneho di nos grandinan pasobra e tempo ey no tabata existi un maneho pa hende grandi, a indica. OPPA no a haya e reunion ey.
Na October 2022, a manda un otro carta pasobra a cuminsa sali noticianan riba e plan di impuesto 2023 y tampoco OPPA no a haya reaccion, a señala.
Na Januari 2023 a bin bek cu e tema di restitucion di e reduccion di e 'gelijkbedrag di e pensionadonan. Tampoco nan a haya reaccion pasobra gobierno di Aruba no tin cen.
Na juli 2023 a pidi gobierno pa bin cu un dialogo social pa trata e situacion y e necesidad di e grandinan. Di parti di Minister Arends a haya un contesta positivo cu probablemente den luna di October lo bin un foro nacional tocante e situacion di e grandinan, Ivo Valdez a duna di conoce.
El a bisa cu e ta spera cu OPPA por saca algo di e foro ey y cuminsa implement'e pasobra e situacion di nos grandinan ta hopi teribel aki riba.
