Pa ciencia, tecnologia, ingenieria y matematica
ORANJESTAD (AAN): E asina yama ‘The STEM Embassy’ (TSE) ta un organizacion lanta na aña 2021 y ta consisti di 12 studiante di Aruba y Curaçao cu ta studia Hulanda, Merca y Suiza. Tur tin e mesun mision: lanta curiosidad y confianza den STEM den un amibiente cu ta accesibel na un y tur ariba e islanan ABC.
STEM ta para pa estudionan den e areanan di Science, Technology, Engineering y Mathematics (Ciencia, Tecnologia, Ingenieria y Matematica). Miembro nan di The STEM Embassy a ripara cu hopi mucha no ta sigui un estudio den STEM, kizas door di miedo pa purba of door di falta di informacion. Awendia e peticion pa ingeniero den sector laboral ta birando mas grandi y e cantidad di studiante cu ta scoge pa bay studia den e ramo di STEM no ta creciendo. TSE a dicidi cu ta momento pa tuma iniciativa y mustra e siguiente generacion di studiantenan cu tin futuro y oportunidad di haya un trabao den STEM riba e islanan ABC. E mision di TSE a bira realidad aña pasa unda nan a organiza nan prome STEM summer camp: “Ki’ Ta Bo STEM? Aruba 2022” unda muchanan a participa den diferente workshop incluyendo robotica, coding, biologia y mucho mas.
Esaki tabata un gran exito. E aña ‘ki TSE ta invita e pueblo di Aruba na e di dos STEM summer camp: “Ki’ Ta Bo STEM? Aruba 2023” pa muchanan entre 12-21 aña di edad y lo tuma lugar dia 26 pa 29 di juli na Universidad di Aruba.
DIARIO a compronde cu tin un total di 150 lugar disponibel y lo tin 6 diferente workshop incluyendo ingenieria, biologia marino, kimica, y hopi mas. Cu e workshops TSE kier pa e muchanan haya un chens pa explora nan interes den STEM y inspira e muchanan pa sigui discubri nan pasion. E evento ta caba dia 29 di juli cu un STEM Festival cu ta habri pa publico. Diferente organizacion y compania den e area di STEM lo ta presente pa brinda informacion na comunidad henter.
TSE kier indica cu no ta importa e nivel di estudio di e muchanan y pa por participa conocemento di STEM di antemano no ta necesario. E meta di TSE ta pa crea interes den e areanan di estudio di STEM den un ambiente mas inclusivo posibel.
Por sigui tur informacion riba nan website www.thestemembassy.com.
