Christie Mettes, Coordinado di e Grupo “Aula di Lama”
ORANJESTAD (AAN)-- Dialuna 8 di Juni a celebra e Dia Mundial di Oceanonan, y den entrevista cu Matutino DIARIO, Christie Mettes, Coordinado di e Grupo “Aula di Lama” a duna di conoce cu aña pasa nan a logra di organiza mas di 200 evento.
“Durante e Dia Mundial di Oceanonan nos ta celebra nos oceanonan y Lama di Aruba cu ta e parti mas importante di nos Isla, y un di e partinan central di Aruba su medio ambiente” Christie a indica.
El a splica cu aña pasa a lanta un fundacion pa coordina hopi di e eventonan di e organizacion y pa atende e aña aki, nan a logra di haci mas di 200 evento. “Y mas di 20 organizacion a uni na nos grupo ‘Aula di Lama’ pa haci uso di espacio pa haci actividadnan aki, of hunto cu nos tanto educativo, como simplemente haci uso di e espacio aki pa nan mes actividadnan”, Mettes a relata.
El a agrega cu nan ta contento cu e acogida aki di nos comunidad. “Awe nos ta bay haci un brindis y nos ta invita pueblo en general, sea esnan cu a scucha di nos of cu awe ta prome dia cu ta scucha di nos, y cu por ta interesa, pa bishita kico tur ta ‘Aula di Lama’, kico tur bo por haci akinan, kico ta e actividadnan cu nos ta ofrece, anto bin uni cu nos den un brindis, anto nos ta pasa over di tur loke nos a haci den un aña y tambe anuncia algun proyecto cu ta biniendo”, Christie Mettes a señala.
“E parti mas grandi cu nos ta indica, aworaki, ta cu nos a haci hopi den e cuadro di educacion, y desde un comienzo e interes pa Aula di Lama, tabata investigacion. No solamente con pa haci informacion di loke tey caba, pero yuda siña mas, compronde mas, di nos ecosistema marino. Den e cuadro ey, luna pasa nos a lanza nos ‘Open Ocean Day Diagram’ caminda nos ta ofrece 20 mil florin, pa investigadornan na Aruba. Awe nos ta anuncia e ganado”, Christie Mettes a duna di conoce.
