Prome Minister tocante e desaroyo di covid-19: --- *Diaranson a yega na un total di 2000 caso activo
ORANJESTAD (AAN) – Minister Presidente mr. Evelyn Wever-Croes, Minister di Salud Publico Dangui Oduber, Dr. Yuri Casseres, Comisario di Polis Irma Gordon, a yama un conferencia di prensa Diaranzon 29 di December awo, pa duna un update tocante e situacion di Covid-19 y aumentonan di caso debi na su variante Omicron.
Premier Wever-Croes, na prome lugar, a expresa cu e conferencia di prensa aki a wordo yama, pasobra gobierno ta preocupa tocante e situacion di Covid-19 y e aumento drastico di casonan pa dia.
E dignatario a referi na e ultimo datonan cu DVG a publica, Diamars tabata tin 439 caso positivo nobo, di cual 353 ta hende local y 86 no residente y e ta spera cu pa Diaranzon e cantidad lo a subi mas.
“Tambe nos por a nota cu e ‘positivity rate’, kiermen esnan cu ta test positivo, e ultimo siete dianan, ta 37%. Kiermen, di tur hende cu ta bay test 37% ta positivo y esaki ta un porcentahe halto”, e mandatario a bisa.
Aruba tin un average di caso di 204 caso pa dia, e ultimo siete dianan aki, e mandatario a señala, indicando cu e cifra aki tambe ta halto.
Esaki ta duna un total di 1.506 caso activo te cu Diamars, di cual 470 ta no residente, y esaki ta un cantidad nunca antes bisto di no residentenan.
Wever - Croes a referi na e medidanan cu a drenta na vigor e siman aki, unda esnan cu ta bin di un pais di riesgo halto y hopi halto, mester test den nan pais prome cu nan bin Aruba. El a indica cu berdad esaki ta trece un tiki consternacion, pero e ta necesario pa baha un poco esnan cu ta test positivo.
Minister Presidente ta premira cu dentro di dos dia, Aruba lo supera 2000 caso activo y den e ultimo siman di aña, si no haci nada, lo yega 3000.
“Aworaki nos ta plenamente den e di cinco ola y a mustra cu slides cu tin e diferente olanan riba dje, cu e ola aki ta surpasando tur e otronan. Berdad e di dos ola tabata un tiki mas halto cu 1600 y pico caso activo y na cierto momento a subi na 1630, sinembargo si weita con lihe e ola aki ta aumentando, y e proyeccionnan cu nos tin, nos ta surpasando esaki y por mira cu omicron ta tumando over, aki na Aruba; pues, nos ta preocupa!”, e mandatario a subraya.
