Situacion preocupante
- Kehonan ricibi merece pa pone toezicht riba e instancianan
- Pueblo ta kehando di varios aña caba
ORANJESTAD (AAN): Señora mr. Jurima Bryson, Ombudsman di Aruba, den entrevista cu DIARIO a elabora tocante e situacion dificil, cu diferente adulto mayor ta pasando actualmente. El a relata cu el a dirigi un carta na Minister Wyatt Ras, titular di Salud, Asunto Social y Asuntonan di Adulto Mayor.
“E carta di preocupacion aki, a trata diferente tema. Mi carta a trata e tema caminda cu nos a ricibi diferente melding, señal, keho encuanto institucionnan cu ta cuida, guia, entre otro, adulto mayor. Laga mi clarifica di biaha cu un melding, un keho, un señal, no necesariamente ta nifica cu e informacion cu nos ta ricibi of lesa, ta corecto. Pues, ora bo ricibi un melding of un keho, si, bo tin cu haci un investigacion pa bo por determina cual hechonan ta berdad, y cual hechonan no por comproba.
Pero, e melding, e señal, e kehonan ta suficiente si, pa cerca nos, en todo caso, tin un preocupacion di loke nos ta yama e toezicht, riba e instancianan aki. T’asina cu den leynan tin diferente tools, pa diferente instancia eherce toezicht riba instancianan priva. Instancianan cu no ta ricibi fondonan di gobierno, pero cu pa motibo cu nan ta duna cuido, ayudo den diferente manera, nan ta cay bao di supervision. Pues, nos carta di preocupacion na Minister tabata dirigi netamente riba e topico aki”, Ombudsman mr. Jurima Bryson a señala.
El a sigui splica cu e melding y kehonan cu Oficina di Ombudsman ta ricibi ta mustra cu aworaki, en todo caso, ta duna indicacion cu no tin suficiente toezicht riba e tipo di institucionnan aki. “Y ta berdad Bureau Ombudsman ta funciona asina cu pa por trata un keho mester a recibi e keho y Bureau Ombudsman tin e libertad di haci investigacion riba propio iniciativa, sinembargo, ora cu nos a manda e carta di preocupacion aki, nos a señala un punto hopi crucial den e parti di cuido y cuido den e instancianan aki”, mr. Juraima Bryson a indica.
El a agrega cu t’asina enberdad cu por cuminza investiga na momento cu bo haya un keho, y e parte crucial den e instancianan aki, ta cu e personanan cu ta aloha e habitantenan den e tipo di instancianan aki, hopi biaha no ta den un posicion pa entrega keho, pasobra nan tin un relacion na unda nan a depende pa gran parti di e instancia ey. “Sea e ora ey nan ta sinti un presion pa no entrega un keho, pasobra nan tin miedo cu despues, kizas, e relacion ta bao di presion of tin habitante, laga nos ta honesto cu otro, cu simplemente no ta den posicion y capacidad di entrega un keho, sea pa motibonan medico of otro asunto.
Den pasado den DIARIO mes, a yega di publica asina hopi reclamo di ciudadanonan cu ta tristo pa mira con nan sernan keri tabata wordo atendi na cierto Cas di Adulto Mayor. Kehonan cu zapatonan di clientenan ta disparce. Kehonan cu clientenan ta keda cu bruki muha bisti di mainta, y te atardi laat ta core cambia nan. Keho cu nan ser keri ta haya asina un herida mahos, y no a informa ni Docter, y tampoco famia di esey. Anto ora di hiba e pashent pa Wondenpoli ta haya zundra “Pakico a tarda asina hopi?”
Kehonan cu hendenan ta mira con tur cliente di Casnan di Adultonan Mayor ta bira “flaco”, y famianan ta bin tende di nan ser keri interna eyden, cu casi nan no ta haya suficiente cuminda, y famia ta cuminza hiba extra cuminda pa nan come tur dia.
Awor cu tin Ombudsman, ta un bon noticia cu awor nan tambe ta ricibiendo e reclamonan aki.
