Entrante awe 15 di November, durante 12 luna:
*Lo bishita 2000 hogar
ORANJESTAD (AAN)—Durante un conferencia di prensa cu a tuma lugar den e Oficina Central di Estadistica (CBS), Desiree Helder, Directora Interino di CBS, a anuncia e comienzo di nan encuesta nobo: “Entrada y Gasto” 2023.
Señora Helder a comunica cu for di awe mes (15 di November) lo tin 20 encuestado pa entrevista hogarnan pa e encuesta aki.
“Kico e encuesta aki ta encera? E encuesta aki ta wordo haci cada cinco pa seis aña, pa CBS haya un bista di locual ta entrada y gasto den e hogarnan. E encuesta aki ta sumamente importante pa nos, pa nos haya informacion pa por ehemplo, nos por tuma prijs di productonan na Aruba, wak e cambio di prijs, pa haci esey debidamente. Pasobra ta hopi importante cu e prijsnan cu wordo tuma, ta e productonan cu hogarnan ta cumpra na Aruba”, Helder a señala.
El a splica cu p’esey nan ta puntra kico tur e consumidor ta cumpra na productonan den supermercado, te cu nan paña, vehiculo di motor, pues tur cos cu consumidornan ta cumpra CBS ta puntra. “Y pa duna nos afdeling concerni, informacion suficiente pa nan wak kico na Aruba ta loke hogarnan ta cumpra, pa por haci observacion di prijs lo miho posible”, Desiree Helder a indica.
El a agrega cu tambe un meta importante ta pa haya enberdad un bista riba kico ta come y bebe den e gasto di hogarnan pa locual ta nan entrada.
“Pasobra hopi biaha nos ta haya e pregunta kico enberdad ta e entrada di hogarnan y kico enberdad nan ta gasta tur luna, y si acaso e entrada ta yega pa e gastonan cu nan tin”, señora Helder a agrega.
El a reitera cu p’esey e informacion aki ta sumamente importante pa CBS por contesta pregunta cu nan ta haya regularmente door di e publico mes, personanan den gobierno y tambe di instancianan cu ta yuda hogarnan na Aruba, pa nan haya informacion relevante y mas actual posible, pa e planificacion di nan yudanza of nan maneho.
Directora Interino di CBS a reitera cu desde awe, Diaranzon 15 di November, e encuestadonan lo bishita 2000 hogar, y esaki ta sosode den un lapso di 12 luna.
“Pues henter e aña cu ta bin te cu October, November 2024, tin encuestado cu lo acerca cada biaha un total di diez hogar pa cada un. Kiermen, pa cada luna 200 hogar lo wordo acerca pa nan por contribui na e encuesta aki, y p’esey tambe nos ta pidi contribucion di e publico en general pa si acaso bo wordo acerca pa un encuestado di CBS”.
E encuestadonan tin uniform bisti. Señora Helder ta pidi e hogarnan cu ta haya bishita pa duna e encuestado e cooperacion necesario, y participa den e encuesta aki.
