Rebecca Naddall, Coordinador:
*Ta bay ta encarga cu estudio local, den region y Hulanda
ORANJESTAD (AAN)-- Den un entrevista cu Matutino DIARIO, señora Rebecca Naddall, Coordinador di e Oficina Ban Studia, cual lo zorg pa informa y guia e hobennan cu ta bay sigui studia un carera profesional, sea local, regional, Hulanda mientras su otro colega ta encarga cu Merca y Canada.
“Esaki ta un iniciativa cu a cuminza aña pasa, na Augustus, ora cu e prome grupo cu a cay bao gobernacion AVP-Futuro, a bay y a traha hopi video cu informacion, specificamente pa Hulanda.
“Nos a start cu e proyecto y a habri e oficina recientemente, pasobra door di duna e informacionnan aki online, nos a ripara cu e necesidad, e demanda t’ey, pa duna hopi mas informacion, un tiki mas trempan, no solamente na studiantenan cu ta den e ultimo aña escolar, pero pa cuminza mas trempan y anto tin un lugar specificamente cu nan por yega p’esey, pa informacion y pa e dia”, señora Naddall a indica.
E Oficina aki ta habri oficialmente awe, Diabierna 27 di Maart, unda cu nan ta bay tin un exposicion di scolnan local, akinan mes, di 4’or di atardi pa 7’or di anochi. “Ta bay tin Instituto Pedagogico Arubano ‘IPA’, Universidad di Aruba, Colegio Educacion Profesional Intermedio ‘EPI’ y OOA (Openbare Avondleergangen Aruba) presente pa duna e hobennan informacion tocante opcionnan na Aruba mes”, señora Noddall a señala.
Ban Studia ta den rednan social, manera facebook, Instagram, Tik Tok, y nan website lo wordo oficializa awe tambe, unda ariba por yega na diferente link, pa haya informacion tambe riba diferente otro pais y scolnan unda nan por studia, y kico ta e pasonan cu nan mester tuma, pasobra tin un plan di stapnan. “Por ehemplo aworaki nos ta bay tin DUO, na Aruba, informando e muchanan di e posibilidadnan na Hulanda, kico tur e debenan ey ta encera, y pa fin di luna nan tin cu entrega caba cierto papelnan na Arubalening, y riba e webiste Ban Studia, nan por haya tur informacion, señora Rebecca Naddall a señala.
