ORANJESTAD (AAN): Ora cu e temblor a dal Diaranson anochi trempan pa 6:04:33 pm,
e prome sistemanan automatiza e “localiza” e epicentro den Lama Caribe, poco panort di Puerto Cabello di estado Carabobo. Pesey a emiti un advertencia na prome instante pa Tsunami.
Sinembargo algun minuut despues ora cu sismologonan a bay revisa e temblor na forma manual, a bin descubri cu e epicentro NO ta den fondo di Lama Caribe, sino riba tera firme, como 25 km pariba di ciudad San Felipe na estado Yaracuy. Pesey a core cancela e advertencia di Tsunami. E magnitud a registra na 7.2º riba Scala di Richter.
Pa colmo, a bin detecta cu pa 6:05:12 pm, un otro temblor mas fuerte aun a registra apenas 8 kilometer mas panort. Esun aki a registra na 7.5º riba Scala di Richter.
Dos temblor devastador sacudiendo tera casi simultaneamente, ta loke a ocasiona destruccion na partinan grandi di Venezuela.
E prome temblor di 6:04 pm di 7.2º tabatin epicentro di 10.38º Nort y 68.52º West. E di dos temblor di 6:05 pm di 7.5º tabatin epicentro di 10.45º Nort y 68.51º West.
E distancia entre e dos epicentronan aki ta di apenas 7,8 kilometer.
