MANAGUA: Autoridadnan a bin admiti, cu por lo menos cuatro persona a perde nan bida Diadomingo na Nicaragua, ora cu Tormenta Tropical Bonnie a pasa na parti zuid di e pais.
E victimanan a muri como consecuencia y efectonan indirecto di Bonnie, esta cu a pone rieunan bay over na henter e pais. Un di e victimanan ta Juan Carlos Aleman Mendoza di 43 aña, kende a muri ora el a salba bida di un grupo di pasahero cu tabata den un Bus cu a wordo lastra door di coriente di rieu Aló Betel, den un zona rural di municipio di Siuna, na parti noordoost.
Den mesun municipio, un otro homber Alberto Flores a muri ora cu el a trata di cruza rieu Matiz riba su cabay.
E pastoor Martin Martinez Gadea tambe a purba cruza rieu El Toro cu cabay, y a muri na San Jose de Bocay. E ultimo victima ta Santiago Lopez, kende a desaparece ora cu el a wordo lastra pa coriente di rieu El Rama.
