ORANJESTAD (AAN) – Sharline Farro, miembro di e Organizacion di Enfermeronan di Aruba (ODEA), den conferencia di prensa despues di reunion cu Formador, a splica tambe cu ODEA ta enfoca riba calidad di cuido
y con esaki ta wordo duna y no den recorte di trahado. ABV ta esun cu ta atende cu e asunto di recorte di personal di enfermeria.
Sharline Farro a señala cu tur enfermero ta haci nan best pa calidad di cuido keda halto. El a subraya cu ODEA ta custumbra di ta creativo den duna cuido y esaki no ta encera solamente e aspecto specializa y material cu nan ta duna, pero tin di haber tambe cu e trato na e pashent y den e entorno, of situacion, den cual e enfermeronan ta traha y ODEA ta preocupa cu nan ta trahando doble turno.
“Cu esey ta bay tin influencia riba e cuido? Si! Cu nos lo traha pa esey lo ta menos? Tambe! Pero nos no por cumpra enfermera den tienda, y pa nos yena e buraco ey pa calidad di cuido wordo duna, comunidad completo mester contribui, balora y respeta e profesion”, Sharine Farro a remarca.
Farro a indica cu manera e ta bay, si sigui den critica so riba e enfermeranan, cu esey no ta stimula nos hobennan pa studia enfermeria. E profesion aki tin un competencia hopi grandi caba cu tur e otro estudionan cu ta afo, y e ta hopi mas atractivo pa nos hobennan y cu sigur ta paga un miho salario tambe.
“Nos tin cu yega na e base pa yena e gap, pasobra nos tin un gap di enfermero MBO pa duna cuido, pero nos tin un gap hopi mas grandi den enfermeronan specializa pa traha riba un ICU, Emergencia, Dialisis, etc. Ora cu bo caba MBO bo tin un periodo di dos aña pa haci di ‘werkervaring’ (adkiri experiencia laboral) prome cu bo haci un specializacion” el a agrega.
Pues, mester yega na stimula nos studiantenan pa studia enfermeria y haya experiencia, pa haci un specializacion. Sharline Farro a subraya cu e ora ey por baha gasto pasobra door di inverti den nos mes hendenan, nan ta specializa y keda na Aruba mes. “E ora ey no ta inverti den specializacion cu ta bin di Hulanda, Spaña, di Merca pasobra Aruba mester di nan, y cu ta bin pa corto tempo, duna e cuido y despues nan ta bolbe nan pais. Esaki ta un preocupacion cu ODEA a trece dilanti durante reunion cu Formador, cu mester inverti den nos enfermeronan na Aruba cu ta keda duna e cuido akinan mes” Sharline Farro a reitera, indicando tambe cu e personal cu ta bin di afo ta hopi aprecia y Aruba mester di nan, pero nan ta temporalmente akinan.
