ORANJESTAD (AAN): Diabierna atardi hopi hende a mira un obheto rondo moviendo poco-poco for di noordoost di Aruba bayendo pa zuidwest di e isla.
E ta un obheto similar cu un Balloon di ‘High Altitude’, pues di altura hopi halto cu tabata pasando di transito riba e isla. E balonnan aki tin hopi uso rond mundo, incluyendo pa experimento cientifico. Na aña 2017 e compania Google tambe a lanza di nan cu yama “Loon Project”, y a yuda e isla di Puerto Rico grandemente despues di e horcan cu a laga casi full e isla sin comunicacion. E tempo aya algun tabata yuda cubri zonanan rural di Peru y tambe Brazil cu cobertura di data pa Internet.
E balon aki no tin hende abordo, y ta djis traha cu remote control y moviendo segun biento di e capanan mas halto di atmosfera ta hiba nan. Esun cu a pasa riba Aruba no a wordo identifica, como cu e no tin ADS-B pa identifica su mes publicamente.
