Siglo 21 a entrega e reto economico y comercial mas pisa for di 1945
*Bienestar di Aruba y trahador Arubano a depende di e fiel comerciante
*Inspiracion diario pa no entrega spada pero adapta na cambio di tempo
ORANJESTAD (AAN) — DIARIO como prome matutino completamente Arubano y independiente di tur influencia cu por stroba e lucha diario pa bienestar di un pais, na mira luz na e momento mas importante den e historia estatal di Aruba.
E entrada di Aruba pa Status Aparte tabata exigi mucho mas, cu eleccion di gobernantenan di e pais cu a wordo mara na ley, cu ta exigi politiconan keda den e cuadro delinea di democracia.
Pa un pais por ta autonomo, e mester di su propio capitan, cu den e caso di Aruba a bira Betico Croes cu hunto cu su tripulacion a guia Aruba den laman sumamente bruto di resistencia sigur den Reino Hulandes, enfrente e resultadonan Status Aparte lo a bira pa Reino.
Na e momento determinante pa nacemento di e Aruba cu nos conoce awe, Jossy Mehsen Mansur a entrega Aruba e matutino DIARIO como e factor mas importante den cualkier lucha, cu ta comunicacion independiente di cualkier forza oponente na e lucha.
Independencia di DIARIO di cualkier inversionista of compania madre, a bira e poder grandi di periodismo skirbi autentico di Aruba pa preserva e bienestar, e moral, e idioma, e autenticidad, e felicidad total di e Arubiano.
Na 2025 Aruba ta recorda 1985, cu tabata e ultimo aña di permanencia di Aruba den Antia Hulandes, pero tambe e aña cu caos a trata di destrui e mayor anhelo nacional di Aruba, cu na e momento cu Status Aparte a bira realidad di Aruba, tabata yora salida doloroso di su lider Betico Croes, cu tabata lucha pa su bida den hospital despues di un accidente cu a percura pa nunca mas Aruba por a mira su lider cu a logra e Status Aparte di Aruba.
For di e momento e lucha pa Status Aparte a haya un contenido mas exigente pa tur Arubiano cu alma Arubano y a bira un lucha pa percura cu e autenticidad di Status Aparte no bay perdi.
For di entrada di Aruba na Status Aparte, e deber di DIARIO como e matutino di Aruba tabata, pa brinda e seguransa cu e futuro pa cual Aruba dirigi pa Betico Croes a lucha, nunca bay perdi.
Den e proceso aki, DIARIO for di su inicio, a conta cu señora Nuhad Mansur-Lameh, cu tabata e alma di maneho administrativo di DIARIO pero tambe un colaborador enorme pa redaccion di e corant debi na su conocemento enorme di factornan historico y internacional.
Pa presenta noticia, e periodista no solamente mester por relata loke ta pasa na cierto momento, pero mester ta conocedor di historia, di desaroyonan mundial mientras e nivel moral y e pakete di balornan ta bira decisivo den e lucha pa e bienestar real di e pais.
Den e cuadro aki DIARIO por a conta y te awe por conta cu señora Nuhad Mansur, cu hunto cu su esposo Jossy Mansur, a percura pa e base moral, e contenido autentico Arubano riba tur tereno, entrega Aruba e arma pa tur lucha cu amaneza e pais.
Tin lucha cu no ta depende di ehercito, manera a keda demostra na mundo for di entrada di DIARIO na entrada di Aruba pa Status Aparte.
Cambio mundial y reto riba tur tereno mester a wordo enfrenta.
Computer a haci su entrada y comunicacion a cuminsa afecta e moral internacional. Aruba tabata tin necesidad di prensa prepara pa por confronta impacto di loke por a destrui e pais.
Na mes momento señora Nuhad Mansur, encarga cu e parti empresarial y financiero di DIARIO, mester a guia e barco di DIARIO den e olanan violento cu comercio internacional a conoce mescos cu desaroyonan mara na cambio di clima y prijs di petroleo.
Materia prima di un corant imprimi na Aruba a afecta e prijs di corant, mientras sistema di computer a haci cu mester a amplia e entrega di DIARIO cu servicio online.
Mientras comercio ya mester a atende cu e pakete di cambio, mundo tabata tin motibo pa mas temor cu por afecta comercio, cu a wordo paraliza pa pandemia Covid-19 cu DIARIO mester a enfrenta cu un maneho dirigi y exigente riba tur tereno.
E riesgo pa recesion a bati na porta. Como empresa DIARIO mester a planifica y na mes momento ahusta na e mihor forma pa sirbi Pueblo di Aruba.
Ta na un momento mundial di tension, señor Jossy Mehsen Mansur a despedi di e mundo aki y e ora e yega pa señora Nuhad Mansur encarga su mes completamente cu e barco DIARIO como empresa y alma di democracia como matutino.
Na caminda pa 25 aña Siglo 21, awe DIARIO den persona di señora Nuhad Mansur, ta rindi homenahe na dirigentenan comercial Arubano, cu for di entrada di Status Aparte mester a carga Aruba den situacion desastroso di salida di Lago, pero a keda fiel na nan pais atravez di tur amenaza local y mundial.
Den persona di Nuhad Mansur, DIARIO ta honra e sistema di comercio liber, e participantenan na cuponan di trabou, cu den situacionnan increibel, a keda e productor di e pan di cada dia di e trahador Arubano.
Un mencion special pa e empresanan chikito di Arubianonan, cu a haci Aruba grandi!
