Desiree Helder, director di CBS:
ORANJESTAD (AAN) – Director di CBS, señora Desiree Helder, a sigui bisa den conferencia di prensa relaciona cu e Sistema Nacional di Estadistica (NSS), cu ta den proceso di implementacion, a cu un di e temanan cu ta wordo enfatiza hopi riba dje, ta “transparencia”.
Helder a splica cu NSS ta crea transparencia no solamente con e conexion di datanan ta sosode, pero tambe den e tecnologia cu ta wordo uza pa calcula e indicadornan, e estadisticanan oficial, pero tambe den ki regularidad nan ta wordo publica, ken ta esun responsable pa esakinan.
Esaki ta crea mas confianza den pueblo tambe riba e estadisticanan aki, pasobra nan ta haya tur informacion cu ta relevante, pa nan tuma un decision berdad e ta bon pa wordo uza of no.
“No ta solamente confianza, pero tambe e ta promove igualdad. Igualdad den e sentido cu un meta hopi importante den e sistema aki, ta produci estadisticanan cu ta comprendible pa tur hende.
“ E mester ta comprendible pa esun cu ta bezig cu maneho di gobierno, pero mester ta comprendible tambe pa un negociante chikito cu ta pensando con pa habri negoshi, na unda pa habri un negoshi, y mester ta comprendible tambe pa un studiante of hasta un mucha cu ta bay eerste klas, pa e por uza e estadisticanan aki pa un proyecto di scol, por ehemplo”, Desiree Helder a señala.
El a reitera cu esey ta crea igualdad den nos pais; un miho manera pa esnanan den nos pais por sigui e maneho, y tambe guia nan mesun bida na un manera responsable.
“Y ta crea mas hendenan cu tin conocemento di nos desaroyonan, y cu ta exigi mas di nos gobernantenan pa nan tambe sigui e desaroyonan cu ta real y pa nan implementa maneho debido.
“ Tambe ta importante pa bisa cu e estadisticanan aki ta imparcial. Ta asina cu hopi biaha tin hendenan cu ta duda di datonan saca afo, pasobra nan tin un of otro idea of interes su tras, pero e intencion di e estadisticanan aki ta pa nan ta imparcial, den sentido cu nan no tin ningun interes mara na nan. Ningun interes politico, ni comercial tin influencia riba e estadisticanan aki”, director di CBS, señora Helder a acentua.
