ORANJESTAD (AAN) – Gabriella Helder, Presidente di Stichting Funari, den entrevista cu DIARIO a elabora tocante e futuro cu nan kier pa e Fundacion.
“Nos vision pa futuro ta pa nos por inclui mas persona cu limitacion den comunidad, na un forma of otro, pa nos por duna nan e miho hermentnan cu nan mester, pa nan por mustra esaki tambe. Pesey nos ta haci e bazaar, ta mustra kico tur nos hendenan por.
“Nos ta bezig tambe cu otro plannan y actividadnan, pero ta poco, poco nos ta bay. Nos kier bisa cu nos kier bay un poco mas den e area tecnico, pero nos ta traha a base di boluntario, nos no tin e fondo pa paga un hende pa duna un training. Pero nos ta habri pa forma un samenwerking cu cualkier otro hende cu ta willing pa yuda nos”, Gabriella a expresa.
Gabriella tin un mensahe pa famianan cu ta bisa cu nan ta wanta nan personanan cu limitacion na cas, y esaki ta pa hiba e personanan aki pafo. Nan tambe ta parti di nos comunidad, nan tambe merece miho, y sacando nan eyfo nan ta haya intercambio cu otro personanan tambe.
“Esey ta e parti mas importante, e intercambio. Pa nos por sinti nos mes cu nos tin un derecho di existencia. Esey pa nos ta conta”, Gabriella Helder a señala.
Papiando di cifra, Gabriella a bisa cu e ultimo cifra cu CBS a presenta, ta alrededor di 200 persona mas of menos. “Pero nos mester corda cu e limitacion ta grandi, pasobra tin persona cu limitacion di bista cu ta bay cerca FAVI, otronan cu limitacion di oido y otro limitacionnan cu ta cay bao otro stichtingnan. Nos mision ta pa yuda esnan cu ta riba rolstoel y esnan cu walker” el a reitera.
Pa celebra e di 44 aniversario, FUNARI tabata tin un Santo Sacrificio di Misa. Nan clientenan mes tabata tin presentacion di poesia, pues nan a pasa un mainta ameno hunto cu Pastor tambe. Esey pa duna danki pa e dia aki.
Den cuadro di e 45 aña nan ta cla for di awo pa celebra e fecha. Nan ta trahando duro caba, nan tin cierto ideanan pero nan lo informa den transcurso di aña kico esakinan ta, y tambe lo acerca comunidad pa forma parti di e plan cu Stichting Funari tin, cu ta un plan grandi. E idea cu nan tin awo ta manera semper nan bazaar.
