President di Parlamento Marlon Sneek:
ORANJESTAD (AAN) -- President di Parlamento, señor Marlon Sneek, den entrevista cu Matutino DIARIO a expresa palabranan di pabien y di gratitud pa tur maestro y docente di Aruba, cu merecidamente ta bay goza di nan dianan di vacancy grandi, unda nan lo por descansa pa recupera energia, y bin cu animo ora e siguiente aña escolar, inicia.
“Sigur nos tur mester ta agradecido na esnan cu a scoge e ofishi bunita aki di ta maestro di scol, pasobra awe mas y mas e ta un reto di ta un maestro di scol cu tanto situacion cu nos ta mira den nos comunidad, cu e adelanto y desaroyonan tecnologico, cu ta keda un reto cada bez mas grandi, pa ta para dilanti klas pa garantiza cu bo ta traspasa y comparti e conocemento na e muchanan ey, cu mañan ta e mucha, e hoben, e ciudadano cu ta bay carga nos pais.
Sigur nos kier manda nan palabranan di pabien y sosega e curpa p’asina boso ta cla pa ora cu vacancy caba nos cuminza atrobe cu nos energia pa duna e hoben e 100% cu cada un di boso ta duna cada dia ta for di boso cama y presenta na scol”, President di Parlamento, Marlon Sneek a argumenta.
El a agrega cu retonan sigur, enseñanza ta keda cu nan, y lo mira sigur un Papiamento cu lo sigui cana su ruta.
