Suzette Dumfries, Economista Cultural y Antropologo-Psicologo:
ORANJESTAD (AAN): E experto arubiano, Suzette Dumfries, economista cultural y tambe antropologo/psicologo, durante un entrevista extenso cu DIARIO a haci analisisnan interesante relaciona cu temanan cu tin haber cu desaroyonan cu ta tumando lugar na nivel internacional, local pero tambe pa cu ser humano.
El a duna di conoce cu su interes di ta simplemente un economista a bira con e por compronde hende den nan contexto cultural. El a bisa cu awendia e ta un hende hopi apasiona y casi obsesiona cu e mes idea cu e tabata tin ora cu e tabata tin 8 aña pa enrikece hende. "Wak bon cu mi no ta bisa pa elimina pobresa, pero pa enrikece hende. Empodera nan pa por tuma decisionnan diferente".
Dumfries a splica pakico. Trahando den 13 diferente pais, el a siña dos cos clave. Ningun pais por desaroya si su hendenan no prospera hunto cu ne. Pero ningun hende por prospera sin su mesun participacion consciente.
Desaroyo economico tin dos aspecto. Un aspecto di un gobierno cu tin e responsabilidad di crea henter un infrastructura cu tin mester pa e pais desaroya y ta bibando den un pais unda gobierno a haci esey. Por ehempel, na Aruba tin cuido medico universal, tin un sistema di educacion na un nivel bastante halto y te hasta parcialmente subsidia. Tin internet, awa limpi, coriente basta stabil, cayanan limpi, pa menciona algun, Suzee Dumfries a bisa.
Tin un infrastructura cu a wordo crea den e 36 aña cu Aruba ta existi cu por bisa cu "nos ta desaroya". Pero den e modelo cu a wordo crea ainda ta keda nos mes responsabilidad individual pa bisa "con ami ta bay crea rikesa, prosperidad riba nivel individual, familiar of comunitario. Nos no ta papia suficientemente di esey. Nos ta papia hopi di desaroyo economico, di inversionistanan cu mester bin, mas cupo di trabao, pero nos no ta papia suficientemente di e individuo y e deber cu e tin pa crea e posibilidad ey pa su mes", a expresa.
