Grupo di ambtenaar:
"Nos ta un grupo di trahadornan di gobierno cu hopi biaha ta wordo lubida y hasta tin biaha mal mira den comunidad pa motibo di otronan. Ta masha tempo nos tabata spera cu lo bin un cambio den e forma di atende cu Ambtenaar y evalua nos trabao. Despues di a scucha esnan di DRH durante nan seccionnan di informacion nos ta full di acuerdo cu e idea pa introduci un ley pa introduce Prestatie Management, cual por trece mas husticia pa trahadornan, principalmente pa esnan cu ta cumpli cabalmente tur dia.
Ta hopi ta esnan cu ta cumpli pero tambe tin esnan cu ta bin trabao pero no ta produci nada. Tambe tin esnan cu ta AO tur siman. Hopi di nos ta frustra na trabao y nos ta acudi na nos hefenan pa solucion. Pero pa bisa e berdad, hopi di nan tambe a frustra y no tin animo pa traha riba solucion pa motibo di un cultura di miedo di pone ordo debi na politica.
E ambiente frustrante aki a haci cu nos a perde hopi hende hoben bon studia cu despues di algun luna ta traha den nos departamentonan, nan a dicidi di renuncia. Tin cu a bay sin ni manda nan carta di retiro, bay sin bolbe mas, dicon? Pasobra di e ambiente di trabao cu no ta motiva bo, ta bo mes mester motiva bo mes of e grupo di coleganan cu si ta traha ta yuda otro. Hopi biaha bo ta traha riba trabaonan cu otronan mester haci nan parti pa abo por caba, pero ora cu bo kere cu nan tey dialuna, nan no tey, of si nan tey mes nan ta bisa bo cu nan lo keda cla cu loke bo mester, ora cu nan kier of por, kere nos palabranan. Ta esaki e sindicatonan ta defende?
En realidad ser un ambtenaar ta suppose di ta un honor di grandi cual ta encera un responsabilidad digno y special pa sirbi comunidad di Aruba. Pesey pueblo merece di sa con su placa di belasting ta wordo gasta pa paga su trahadornan di gobierno y no di Sindicato.
Nos ta haya cu hopi biaha sindicatonan ta mal representa nos como trahadornan. Si sector priva ta evalua su trahadornan, Gobierno mester ta e promer pa duna e bon ehempel y haci igual. Si bo considera e beneficionan secundario cu nos ta haya, nan ta hopi mas mihor cu sector priva, pa no papia mes di nos dianan liber cu tin biaha tin algun di nos no sa kico pa haci cu tanto dia liber.
Nos kier haya respet y aprecio di nos mesun famianan y di comunidad pa e trabao cu nos ta haci pesey nos si ta na fabor di wordo evalua, basta cu e ta sosode na un manera structura, integro y husto. Hasta nos ta tribi di bisa cu si nos como pais kier forma ciudadanonan husto, balente, integro y cu ta respeta otro y e placa di comunidad cu ta paga nos, nos tur mester bay di acuerdo UNANIMAMENTE pa introduci e cambionan aki cu ta inspira; Responsabilidad y Seriedad na trabao.
Pero mester bisa cu ta e propio politiconan a daña henter e ambiente na trabao ora cu nan a cuminsa nombra hendenan directo den departamentonan cu no ta pasa den e proceso di solicitud corectamente. Y coordinadornan hopi biaha ta drenta departamentonan comosifuera ta nan ta hefe di nos hefe. Tur Partido politico a practica e sistema aki di Patronahe politico. Pesey nos ta spera cu ley nobo y e sistema nobo aki di Prestatie Management caba cu patronahe y inhusticia. Pero tambe tin coleganan di nos cu a bin aden di politiek cu hopi bon capacidad y nan no kier no kier ta mara na politica of sindicato. Nan kier wordo reconoci pa resultado cu nan ta produci na trabao y no pa un color politico.
Pesey nos ta pura pa Implementatie fase di e Prestatie Management cuminsa.
Nos respeta opinion di algun sindicato, pero tambe nan mester respeta esnan cu ta pro “Effectief dienstverlening”, si wak e asunto realisticamente Prestatie Management ta na bienestar di tur departamento, trahadornan y bon pa pais Aruba awor y futuro, cual ta Algemeen Belang.
Grupo di Ambtenaar Pro Prestatie Management Aruba.
