Skirbi pa Mercedes Monge
Seccion Hubentud den Movecion kier a manda saludo cariñoso, cordial y di gratitud na tur e maestronan cu Dialuna 5 di October a celebra e Dia Internacional di e Maestro/Docente.
Nan merece tur nos palabranan di danki y pidiendo Dios Su bendicion, pasobra cu nan pasenshi, dedicacion, amor, stimacion y vocacion nan ta comparti cu nan mucha y hobennan studiante, nan profesionalismo pa duna cada dia e aprendizahe na e generacionnan cu ta lantando awe, sea den nan enseñanza basico, secundario of avanza.
E maestro/docente, no ta limita nan mes na siña conocemento, tambe nan ta un fuente di inspiracion, nan ta motiva, acompaña y transforma bida. Cada bez cu un alumno siña algo di cual no tabata tin conocemento prome, cada bez cu nan ta wordo anima y stimula, cada enseñanza, cada ayudo pa nan compronde miho, cada muestra y gesto di cariño y comprension ta laga un marca den e alumno cu lo keda para semper den dje, como ser humano, ciudadano, y kizas meneer of juffrouw di scol den futuro.
Pesey, Seccion Hubentud den Movecion, kier a gradici tur maestro/docente pa nan invaluable trabao, perseverancia, y pa sembra un cunuco yena cu semia di conocemento, balor y soñonan cu ta florece y duna fruto den cada alumno, den cada studiante, for di un raiz solido y fuerte. Dios bendiciona tur nos maestronan/docentenan den nos veld di Enseñanza akinan na Aruba y na henter mundo.
