Monique Giel-Labad, Tienermoeder WGK:
ORANJESTAD (AAN): Monique Giel-Labad, Nurse Profesional di Wit Gele Kruis, encarga cu “Tienermoeder”, den un entrevista cu Matutino DIARIO, a indica cu nan ta enfocando riba e aspecto preventivo, pasobra mirando e casonan cu ya caba ta hopi intensivo, ta haci e trayecto di guia hopi dificil.
“P’esey tambe nos pensamento ta bay pa nos traha mas preventivo y cuminza na cual edad. Den e caso aki nos ta wak e edad cu ta bon pa nos traha den dje direct preventivo, ta e grupo di muchanan cu ta bay scol basico; edad di 9, 10, 11 aña.
Si mi wak bek diez, diescinco aña pasa, e muchanan ya caba tabata activo den 5de cu 6de klas. P’esey tambe cu nos a cuminza cu ‘Biba Amor’ pero nos ta duna e charlanan aki, nos ta duna e guianan, coaching, y nos ta ripara cu e parti di actividad sexual ya caba edad a subi pa 15, 16 aña, cu ta algo positivo”, Monique Giel a comenta.
Giel a bisa cu loke nan kier ta pa edad subi na 16-17 aña manera ta na Hulanda. Na Hulanda pa e hoben tin relacion intimo pa prome biaha, edad ta rond di 16-17 aña.
“Pasobra nan ta bira mas conciente cu locual nan ta haya na informacion”, Monique Giel a indica.
Monique Giel-Labad a comenta cu durante nan charlanan den Klas, nan ta traha un vragenlijst. “Nos por duna charla, pero nos no sa si e informacion ta yega, si nan ta compronde bo informacion, y tambe nos kier sa kico tur ta e necesidadnan di e muchanan, e hobennan. Ora nos ta laga nan yena un vragenlijst y a base di esey nos ta analiza y nos ta saca e ora ey locual ta e necesidadnan”, Monique a relata.
El a splica cu nan ta parti’e entre mucha muher y mucha homber, kico mucha muher ta pensa, y kico mucha homber ta pensa.
“Cerca e muchanan homber locual ta resalta y cu nos ta haye hopi positivo, y esey ta cu nan kier sa mas ki ora nos ta papia di un grupo di amigo of amigo saludable. Ki ora nos ta mira cu e amigo of grupo di amigo cu nan ta cera cu ne, ta muchanan saludable, cu bon pensamento y cu no ta yega pa hiba nan den mal caminda, anto esey pa mucha homber nos ta haya hopi positivo”, Giel a remarca.
Di parti di mucha muher locual a sali hopi pa dilanti, of cu esey a resalta, ta cu nan tabata kier a haya sa mas riba abuso sexual, anto esey ta un punto di atencion pa nos, y esey kiermen cu si mucha muher ta haci e preguntanan aki, ta cu algo ta pasando cu e grupo cu a señala esaki, Monique Giel a señala.
