Tisa LaSorte, CEO AHATA:
- Encuanto acomodacion Airbnb pa turista
ORANJESTAD (AAN):Tisa LaSorte, CEO di Aruba Hotels And Tourism Association (AHATA), den entrevista cu Matutino DIARIO, a señala cu e tema di acomodacion pa turistanan ta uno cu nan ta bin papia di dje, for di hopi aña.
Esaki ta un asunto cu ta rekeri di hopi trabao, pasobra tin diferente tipo di apartamento, cas, y doñonan di e propiedadnan.
“Pero e trabao no mester para nos pa haci lo necesario. Pero tin hopi software awendia, pa hopi aña a wordo ofreci, ATA tambe a ofrece pa duna e software pa yuda cu empleado, na Imigracion tambe tin hopi informacion pasobra ora hende drenta nan mester skirbi unda nan ta keda, pues tin hopi manera pa bay tras di e problema aki. Djis cu e ta trabao”, Tisa LaSorte a señala. AHATA tin e tema aki como un topico cu nan ta keda ripiti.
“Nos ta kere cu no ta solamente pa organiza, pero pa priorisa. Dus, loke ta pasa ta cu mester compronde cu e ta un prioridad, pa e ora ey un of varios departamento pone e energia su tras, pasobra e ta un prioridad”, LaSorte a subraya.
El a reitera cu esaki ta algo cu hopi aña AHATA ta papia di dje, anto falta accion. “Nos kier, no djis mira decision so, nos kier mira accion, y accion cu ta hiba nos den direccion positivo. Esaki ta yuda tur hende, ta yuda gobierno pa haya mas entrada, e ta yuda nos sector di turismo, pa bo cu bo tin un sector mas sigur y ken ta operando riba e industria, cu tin un cierto standard di calidad., y bo tin cu enberdad e competencia ta mas husto”, señora Tisa LaSorte a señala.
