Minister Gerlien Croes:
ORANJESTAD (AAN): Durante un rueda di prensa na stadion mes, dia 27 di mei 2025, Minister Gerlien Croes a informa cu e stadion lo wordo cera temporalmente pa continua cu e fase final di trabou. E decision aki ta basa riba e necesidad pa finalisa varios aspecto tecnico y structural di e edificio, e pista di atletismo, y otro trabounan relata ainda pa cu e uzo di e cancha pa futbol. Esaki despues cu tawata falta tur transparencia y cooperacion di parti di esnan cu tawata encarga cu e proyecto bou di auspicio di e gobierno saliente.
Minister Gerlien Croes kier duna claridad encuanto e situacion actual, specialmente riba e pista di atletismo y e falta di un fecha oficial pa reapertura. Poniendo enfasis riba e paso cu ta wordo tuma y e plan di accion cu ta den ehecucion.
Pa e pista di atletismo por wordo oficialmente acredita, tur elemento tecnico mester ta cla y cumpliendo cu normanan internacional. Esaki ta un paso esencial pa por duna uzo regular pa entrenamento y eventualmente pa competencia local y internacional.
Den e marco di transparencia y cooperacion continuo, Minister Gerlien Croes ta informa cu dia 18 di mei ultimo, un reunion a tuma luga cu Aruba Athletics Federation (AAF) pa informa tocante e desaroyonan reciente. Adicionalmente, dia 20 di juni, a tuma luga un otro encuentro clave cu representantenan di MONDO, AAF y e Ministerio mes, pa duna detaye tecnico y garantia di e ehecucion corecto di e proximo fase.
Minister Gerlien Croes tambe kier pone enfasis cu comunicacion cu e federacionnan deportivo ta continuo y di importancia, y cu e team di su Ministerio ta den contacto constante cu e entidadnan relevante cu ta haci uzo di e stadion. E meta ta pa mantene un dialogo abiertamente y pa integra e input di esnan directamente impacta den e desaroyo di e proyecto aki den su totalidad. Alabes ministerio ta preparando un plan di construccion cu por acapara tur e trabounan ainda cu a keda sin wordo hasi of cu no a keda finalisa den e proyecto aki.
“Nos ta traha duro pa entrega un stadion funcional, sigur y di nivel como debe ser pa nos atletanan y pa comunidad. E trabou ta sigui, y mi ta compromete pa e proyecto wordo finalisa lo mas pronto cu ta posibel”, Minister Gerlien Croes a subraya.
Nos compromiso ta: un Stadion Guillermo Prospero Trinidad cla y funcional pero cu tur debido transparencia tambe na comunidad.
