ORANJESTAD (AAN) Diahuebs mainta, a tuma lugar banda di e pier ex-Brisas del Mar,
un conferencia di prensa dirigi pa señor Norman Thijsen, di Fundacion Savaneta Prome Capital. Tabata presente Minister di Economia y Finanzas, Geoffrey Wever, y representante di CEDE Aruba y ATA respectivamente.
E meta di e rueda di prensa aki ta pa anuncia un evento hopi grandi cu ta bay sosode na Savaneta. Norman Thijsen a splica:
“E t’asina aki cu Fundacion Savaneta Prome Capital a wordo lanta tres aña pasa, y nan a bin cu e idea di e evento aki cu ta carga e nomber di ‘Savaneta Seafood Festival’.”
Nan a splica cu esaki a bin, debi cu nan kier un evento autentico Savaneta y Aruba, principalmente den e parti di turismo.
“Mi ta kere cu cant’i lama, cuminda di lama, ‘ta nos cos’ na Savaneta, y mi ta kere cu esey ta un di e miho factornan cu nos por promove Aruba”, Norman Thijsen a relata.
El a splica cu tres aña pasa e proyecto aki no tabata factible door cu e ta un proyecto hopi grandi, e ta tuma tempo, y tin cu plani’e hopi bon. “E ta tuma un cincuenta boluntario cu ta bay ta riba pia. E tin un budget, gasto hopi halto tambe, cu nos cu ta un fundacion cu, en principio, no ta haya subsidio; nos ta riba nos mesun forza, ta importante pa haya partnernan cu ta kere den bo proyecto, p’esey mes, hunto cu mi, mi tin CEDE Aruba y ATA cu a gusta e idea aki ”, Norman Thijsen a señala.
