Ministro Geoffrey Wever:
- Marcando paso concreto den implementacion di Corporate Governance
- Tambe fortalecemento institucional di sector primario
ORANJESTAD (AAN): Gobierno di Aruba, bou di liderazgo di Minister di Finansa, Asunto Economico y Sector Primario, Geoffrey B. Wever, a formalisa e nombramento di señor Michel Janssen como miembro di Raad van Commissarissen (RvC) di Aruba Agri Development Company N.V. (AADC).
E nombramento aki ta un paso concreto den implementacion di e principio di Bon Gobernacion y Corporate Governance, conforme cu lo cual a ser stipula den Programa di Gobernacion AVP-Futuro 2025–2028, den cual fortalecemento di sector publico y gobernacion responsabel ta ocupa un posicion central den e maneho di gobierno.
E proceso cu a culmina den e nombramento aki a sigui un trayectoria structura y transparente. Na september 2025 a aproba e profielschets oficial pa un miembro di RvC di AADC, adelantando riba implementacion formal di e Codigo di Corporate Governance y conforme cu e deelnemingenbeleid di Aruba.
Basa riba e profielschets aproba, e vacatura a wordo publica den media local, resultando den 23 aplicacion di profesionalnan cu diferente background. E Implementatieteam Corporate Governance a haci un evaluacion independiente, culminando den un recomendacion formal di tres candidato.
Despues di evaluacion cuidadoso y tumando na cuenta e necesidad strategico di AADC, e nombramento di Michel Janssen a wordo formalisa .
“Bon Gobernacion no ta un concepto abstracto. E ta un compromiso concreto cu transparencia, profesionalismo y responsabilidad. E proceso cu a conduci na e nombramento di Sr. Janssen ta un ehempel claro di con Gobierno ta aplica principio di Corporate Governance den practica,” Minister Wever a remarca.
AADC, estableci na maart 2024, ta un instrumento clave pa stimula di sector primario, incluyendo e desaroyo di un Agrifund, fortalecemento di iniciativa empresarial agricola y e creaccion di un Agri Innovation Park.
Cu e nombramento di Sr. Janssen, Gobierno ta consolida e structura di supervision di e compania, garantisando cu e RvC tin e capacidad financiero y strategico necesario pa guia e desaroyo duradero di AADC.
Sr. Michel Janssen tin un MBA y tin amplio experencia den finansa riba nivel senior trahando desde 2024 como Division Manager Finance na WEB Aruba N.V. Prome cu esaki, Sr. Janssen a funciona como Hoofd Financial Planning & Analysis. Su formacion y experencia local y internacional ta cumpli cu tur e rekisitonan pa e funcion di miembro di Raad van Commissarissen di AADC.
“Nos sector primario ta un prioridad nacional. Pa logra crecemento duradero y diversificacion economico, nos mester structura institucional fuerte. Cu e nombramento di Sr. Janssen, nos ta fortalece no solamente un persona den un puesto, sino nos ta fortalece e maneho di un instrumento fundamental pa futuro economico di Aruba.”
E nombramento di Sr. Janssen tambe ta marca un paso significativo den profesionalisacion continuo di empresanan estatal. Door di aplica un profielschets formal, evaluacion independiente y seleccion basa riba merito, Gobierno ta manda un señal claro di stabilidad, transparencia y responsabilidad institucional.
Gobierno ta reafirma su compromiso cu implementacion di Codigo di Corporate Governance den tur empresanan publico. E meta ta pa crea un sector publico cu ta resiliente, profesional y enfoca riba resultado concreto pa beneficio pa tur ciudadano.
