Segun Clifford Rosa, Presidente di Fundacion Rancho:
*Pakico celebra y cual ta su balor agrega?
ORANJESTAD (AAN)—Clifford Rosa, Presidente di Fundacion Rancho, a declara den entrevista cu DIARIO cu ya caba nos ta na Mei 2024 y pa algun aña caba ta wordo papia di celebracion di 200 aña di Oranjestad, cual fecha oficial ta 24 di Augustus venidero, pero e no ta mira cu tin coordinacion entre e diferente actornan pa loke ta trata desaroyo di Oranjestad.
Clifford Rosa a expresa cu como iniciado, Fundacion Rancho ta lamenta di wak e situacion cu tin aworaki cu no tin mucho atencion pa e celebracion sino pa si e ta historicamente proba of no proba, y tur esaki tin di haber cu e parti academico, of e parti di investigacion.
“Pero di otro banda nos ta den un area cu nos ta purba di foment’e na un manera mas positivo, di inclusion, mirando cu SDG's (Sustainable Develop Goals) ta papia di ban traha hunto, den colaboracion; SDG's ta papia di un ciudad cu mester di su atencion, pues un ciudad dinamico, un economia cu ta draai, etc. Dus, ora bo ta wak tur e aspectonan pakico un ciudad ta algo vibrante, ta pasobra tin un plan, tin un maneho, tin un sistema…
Y, nos ta desea di gradici e hendenan cu a mira toch, oportunidad, eigenlijk, door di e celebracion di 200 aña y ta pensa cualkier cos pa haci, pa mehora Oranjestad y e comunidad cu ta frecuenta e area aki, cu ta cosnan cu ta poni pa atencion, mi ta spera cu den e simannan of lunanan cu ta bin prome cu e dia di celebracion cu ta 24 di Augustus 2024, cu lo tin mas atencion tocante: 1. Pakico nos tin cu celebra y 2. Kico ta e balor agrega di tin un Capital, un ciudad, cu ta celebra Bicentenario”, Clifford Rosa a destaca.
Rosa a señala cu un biaha so bo ta yega na un fecha asina ey, y si ta djis pasobra a haya oro tambe ta bon, pero tin un proceso. “Anto, e proceso di concientizacion mi ta kere ta locual cu mester, y por mira cu hopi, pero hopi hende, no sa di su historia, ni si el a imigra bin biba na Aruba, anto a inverti den e pais sin sa su historia eigenlijk, ta hopi di lamenta. Y mi ta mira cu tin hopi traba den e direccion ey”, Clifford Rosa a remarca.
