Jeremy Lampe, profesional den steelband:
*Ohala gobierno por cay aden y mustra nan cu esaki ta cultura di Aruba
ORANJESTAD (AAN) — Jeremy Lampe, profesional den e mundo di steelband, den su entrevista cu DIARIO, el a elabora riba e cambionan cu a surgi den su trayectoria di 46 aña tocando steelband.
Jeremy a bisa cu e cambionan enberdad ta bin cu tempo. Den e epoca cu el a cuminza ta bari so nan tabata toca. Budget ta hunga un rol y e hotelnan a pidi pa baha e cantidad di gruponan musical. E gruponan a baha di 12 pa 6, y asina a sigui consecutivamente te yega na un solo persona ta toca. Y ora yega na un e so no por toca cu full un orkesta. E ora ey e ta busca un tipo di pista pa acompaña anto pa haci steelband riba dje.
Kiermen, di un grupo grandi a bira un solo persona. Lampe tin gana di bay bek na e sistema grandi atrobe, pero e no sa si gobierno mester cay aden, y splica e hotelnan cu steel band ta un cultura di Aruba, y cu por pusha esaki den algun show na hotel.
El a señala cu hopi turista ta pasa cerca dje na Aeropuerto y bise cu nan no ta haya ningun steel band na hotel, y awo nan ta haya su persona na aeropuerto. Pues, e ta haya cu eynan falta un poco.
Jeremy tin un mensahe pa e hobennan y a bisa cu enberdad ta dificil pa haya na Aruba e barinan aki (steel band), pero tin manera pa busca nan afo. E ta algo hopi nice pa siña.
El a comenta cu el a wak den e parada sunset e hobennan biba cu steel band, nan tin gana pero no tin manera pa yega na dje ainda. “Pero tin manera pa ordena nan di afo y nos ta entrena e hobennan”, Jeremy Lampe a conclui.
