Tur loke ta parti di Cuido Medico mester ta alcansabel pa Pueblo - *Pueblo mester por cubri tur loke ta prijs di bon cuido medico - *Proyecto hospital no mester tabata “cinco strea” pero “cinco realidad”
ORANJESTAD( AAN) — Uno di e abusonan mas grandi contra bienestar di Pueblo di Aruba, tabata e proyecto di hospital cu a bira parti di e 1.6 Biyon cu Parlamento di Aruba a entrega sin control na Gobierno Mike Eman.
Un “fata morgana”, un ilusion falso, a wordo crea na horizonte di mundo medico di Aruba, den cual e cuido na hospital ta sumamente importante.
Con ta abusa di e confiansa di Pueblo y ta despista Pueblo, por wordo mira den e forma cu a scoge pa placa circula y bula di un fondo di Pueblo pa otro, mientras bienestar di e Arubiano mes ta spart for di otro.
Na hopi ocasion DIARIO a splica cu e proyecto di hospital no mester tabata di “cinco strea” na un horizonte cu no ta existi, pero di cinco realidad pa un Pueblo cu mester paga pa Cuido Medico.
Ora papia di placa y Cuido Medico, ta mishi directamente na e berdad cu hopi hende kier sconde.
Pa un bon Cuido Medico mester di placa, cu ta wordo bon uza y no abusa.
Planificacion di gastonan di Cuido Medico ta exigi conocemento di e materia. Mester gasta placa na loke ta necesario y esaki ta nifica percura cu cada cent cu wordo gasta, ta na forma responsabel.
Awe continuamente por tuma nota, cu no por papia di responsabilidad den gastonan cu a wordo haci pa construi un hospital nobo, loke directamente ta afecta bon funcionamento di e hospital mescos cu e cumplimento di exigencia mara na bon cuido medico.
Ora papia di bon Cuido Medico na un pais, no ta papia di e grandura di un hospital. No ta papia di cama luhoso ni di streanan, cu ta pertenece den proyectonan di night club y no di hospital.
Un hospital,mescos cu tur loke ta parti di Salud Publico, mester ta acesibel pa Pueblo.
Si traha un hospital riba un cero cu ningun hende por subi, e pais no tin hospital pa Pueblo. Si traha un hospital sin porta, e pais no tin hospital pa Pueblo, pasobra hende no por drenta pa haci uzo di e hospital.
Si traha un hospital cu prijs sumamente halto, e hospital aki no ta acesibel na forma optimal pa Pueblo, pasobra Pueblo mester por cubri gastonan di un hospital.
Esaki ta haci cu tur placa cu ta wordo gasta den un proyecto di hospital mester yuda pa Pueblo por haci uzo di ciencia y facilidad medico cu e centro ta ofrece.
Aruba ta depende di AZV, cu ta obligatorio. Si AZV no tin fondo, e no por paga hospital. Si prijsnan di hospital ta hopi halto, AZV no por paga.
Na hopi ocasion nos a mustra cu e prijs pa construccion di e hospital, ta un peso pa Cuido Medico adecua na Aruba.
E situacion di Covid-19 a afecta e forma cu Cuido Medico ta alcansabel pa tur miembro di comunidad, na diferente pais na mundo.
Ora bay analisa tambe, ta mira cu na hopi di e paisnan aki tambe cu tin problema cu Cuido Medico na nan hospital, e planificacion pa evita gasto cu por bira dificil pa cubri, ta presente.
Esaki ta haci cu na hopi pais, cu hospital cu a costa capital, no por papia di progreso medico y no por bisa cu tin bon Cuido Medico pasobra hende no por haci uzo di cuido.
Cuido Medico na Siglo 21 sigur mester a tene cuenta cu edad di poblacion y exigencia pa Cuido Medico. Mester a tene na consideracion progreso medico cu ta exigi mas inverion y mester a tene cuenta cu desaroyonan inespera.
Awe cu madurez mester atende tur loke ta afecta Pueblo pa por enfrenta un situacion mundial dificil, cu riba termino cortico lo bira mas dificil.
